#Врач-влакланТау акций кышкарыште «Единый Россий» партий 74 тӱжем утла еҥым обслуживатлыше Шернур районысо рӱдӧ больницылан у реанимобильым налын пуэн.
«Больницыште чылаже 145 койко уло. 46 врач пашам ышта, кеҥежым эше самырык специалист-шамычым вучена. Тыгеат лиеда, южгунам пациентлан специализироватлыме медицине полыш кӱлеш, да ме тиде черлым кӱчык жапыште Йошкар-Олашке наҥгайышаш улына. Сандене тыгай пӧлек мыланна моткочак шергакан», — палемден Шернур больницын тӱҥ врачше Сергей Богданов.
Реанимобильыште шодым искусственно вентилироватлыме аппарат, дефибриллятор, пульсоксиметр, глюкометр да шуко моло оборудований улыт. Нунын полшымышт дене черлылан автомашинаштак хирургический операцийым ышташ лиеш.
«Газель» автомашина сравочым «Единый Россий» партийын Марий регионысо пӧлкажын секретарьже Александр Гречихо Шернур больницын тӱҥ врачше С.Богдановлан кучыктен да врач-влаклан шкем чаманыде тыршымыштлан, калыклан йӱдшӧ-кечыже полшымыштлан уло чон дене тауштен.
М.ИВАНОВА
