УВЕР ЙОГЫН

Кокымшо азат таза шочын

Марий Элыште коронавирусан эше ик ӱдырамаш таза йочам ыштен.
Кокымшо йоча дене 38 арня мӱшкыран 34 ияш ӱдырамашым Медведево районысо рӱдӧ больницын коронавирусан пациент-влаклан палемдалтше хирургический да акушерско-гинекологический профилян отделенийышкыже 12 майыште пневмоний деч эмлалташ пыштеныт. Врач-влак пациентын тазалыкшым «нелылыкын кокла йыжыҥже» семын акленыт. Ӱдырамашын да ава кӧргыштӧ вияҥше азан тазалыкыштым больницын акушер-гинекологшо эскерен.
Стационарыште визымше кече эмлалтмыж годым ӱдырамаш азам ышташ тӱҥалын. Тунам больницыш Йошкар-Ола гыч Перинатальный рӱдерын медикше-влак миеныт да азам ӱдырамашын авагудыжым пӱчкын луктыныт.
Ош тӱняшке ӱдыр толын! Медицине велым шымлыме годым тудын таза улмыжо рашемын. Но йочан коронавирус дене инфицироватлалтше аваж дене кылже лийын, сандене тудым Йоча республиканский клинический больницын инфекционный отделенийышкыже наҥгаеныт.
Аважым Медведево больницыште пареммешкыже эмленыт да мӧҥгыжӧ колтеныт.
Республикыштына тиде коронавирусан ава деч шочшо кокымшо йоча. Икымше ӱдырамаш таза йочам апрельыште ыштен ыле.

М.ИВАНОВА

Опубликовать в Одноклассники

Добавить комментарий