ЭКОЛОГИЙ

Сандалыкысе пӱртӱс тӱрлӧ виян…

Пӱртӱс вий манына. Сандалыкыште чыла наста, чондымо але чонан пӱртӱсын вийже дене ышталтын. Чондымыжо ик семын иланен,  янлык, вольык инстинкт почеш илат, а айдемылан пӱртӱс эше ушым пӱрен, тудым шонен моштышым ыштен. Ожнысо айдеме лач пӱртӱс закон дене келшышын илен, вияҥын, шкаланже шинчымашым поген, тунемын.

Теве ынде компьютеризаций, цифровизаций, глобализаций саманышке шуынна. Дворец гай пӧртышто илена, ала-могай экзотике эллашкат миен толын коштына, чапле деч чапле вургемым интернет гоч налын чиена, тӱрлӧ- тӱрлӧ витаминиан продуктым кочкына. Паша ышташ айдеме вий огеш кӱл, робот алмашта, ожнысо «вий уло, уш огеш кӱл» ой манмет мондалтын.

 Меже вет ушан улына-с, ала чержымат шонен лукмо? Эсогыл лӱмышкыжат вик кугыжан короныжымак «упшалтен» шындыме. Тынар ушан улына гын, молан тымарсек пареҥгым кочшо жукым пытарен  огына керт, а айдемым пытарыше черым кычал мумо?!

Шинчаваш ужын мутланаш огына ярсе, пожалуйста, виртуальный кыл дене куанен иле, чер амал пӱртӱсын «кӱштымыж» дене вашмутланаш «чарен».

Кеҥеж шуын огыл, айдемын титакшылан верч тынар чодыра йӱла. Пӱртӱслан мыняр кугу эҥгек ышталтеш!!! Ӧраш гына кодеш, тиде поянлыкым айдеме пӱртӱслан кузе да кунам пӧртылтен кертеш?! Кеч-можат пӧртыл толшаш, санденак, очыни, пӱртӱсшат, ӱчым ыштымыла, айдемылан тачысе  кечын яндар южышкат лекташ чаракым ышта…

Елизавета Алексеева

Морко район

М.Скобелевын фотожо

Опубликовать в Одноклассники

Добавить комментарий