Марий Элыште у коронавирус инфекций дене черланыме кажне луымшо случай – ӧрдыж кундемла гыч кондымо.
COVID-19 дене инфицироватлалтмым рашемдаш тӱҥалме жап гыч таче кече марте республикыштына 1438 случайым регистрироватлыме, ты чот гыч 134 случайже – кондымо. Черланыме чумыр чот гыч 32,5 процент случай 50 гыч 64 ияш марте ийготан-влаклан логалеш, 17,7 процент случай – 65 ий деч кугурак-шамычлан, 31,5 процент случай – 30 гыч 49 ияш-влаклан, 9 процент случай – 18 гыч 29 ияш-шамычлан, 1,5 процент случай – 15-17 ияш подростко-влаклан, 4 процент случай – 7 гыч 14 ияш школьник-шамычлан, 3,5 процент случай – 1 гыч 6 ияш марте йоча-влаклан да 0,3 процент случай – 1 ияш марте икышве-шамычлан. Гендерный манме ойыртем шот дене у коронавирус инфекций дене черланыше-влак коклаште 820 (57%) случай ӱдырамаш-влаклан логалеш, 618 случай (43%) – пӧръеҥ-шамычлан. Паша сферым палемдаш гын, пандемий дене кече еда кучедалше медик-влак кокла гыч 165 еҥ (11,5%) черланен.
Пытартыш суткаште у коронавирус инфекций дене черланыме эше 41 случайым регистрироватлыме. Ты чот гыч 33 еҥым эмлымверыш пыштыме. 16 пациентын черже куштылго формо дене эрта, 15 черлын тазалыкшым врач-влак «нелылыкын кокла йыжыҥже» семын аклат, ик еҥ неле состоянийыште. Индеш граждан черланымыжым йӧршын огеш шиж.
Республикысе кок лабораторийыште пытартыш суткаште коронавирус дене инфицироватлалтын кертмым рашемдыме шотышто 850 шымлымашым эртарыме, черланымым регистрироватлаш тӱҥалме жап гыч таче кече марте чылаже 36332 тестым ыштыме.
Кызыт COVID-19 дене черланен кертыныт манын шонымо 1546 еҥым, ты шотыштак тымарте инфицироватлалтше-влак дене кылым кучышо 1526 гражданым, медицине велым эскерат. Регистраций гыч 7667 еҥым кораҥдыме.
Роспотребнадзорын Марий Элысе виктемже эше ик гана ушештара: инфекцийын шарлымыжым чарен шогалтыме йӧн эн ончычак мемнан кажнына дене кылдалтын. Кидым шовын дене чӱчкыдын мушкына, антисептик, медицине маске да перчатке дене пайдаланена, социальный дистанцийым кучена гын, лишыл жапыште ончычсо гай илышыш пӧртылын кертына.
М.ИВАНОВА
