Почётный донор улам…
Почётный донор улам. Кок ий ынде почётный донор-влаклан тӱлымӧ окса кугытым кугемден огытыл. Мо дене тиде кылдалтын да кунам ты оксам индексироватлат?
Н.Николаев.
Советский район.
Йодышлан Медведево районын прокуроржын полышкалышыже С.Г.Захарова вашештен:
— «Вӱр донорство да тудын компонентше-влак нерген» федеральный закон дене келшышын, «Российын почетный доноржо» оҥыш пыжыктыме пале дене палемдалтше-влаклан тӱлымо окса кугыт 12373 тенгеш шуэш. Кажне ийын тиде кугыт 1 январь гыч федеральный закон дене, финанс ийлан могай инфляций лийын кертме кугытым шотыш налын, федеральный бюджет гыч индексироватлалтеш. 2015 ийысе федеральный закон дене 2018 ий 1 январь марте тидым чарыме. Сандене 2015, 2016 ийлаште индексаций лийын огыл. Россий Правительствын пунчалже дене келшышын, 2017 ий 1 февраль гыч почётный донор-влаклан тӱлымо окса кугытым 1,054 пачаш индексироватленыт.
Мыйым толеныт…
Мыйым толеныт. Преступникым муыныт, но тудо окса роскотым пӧртылташ тореш лийын. Оксам пӧртылтыжӧ манын, мый мом ыштышаш улам? Полиций тидын шотышто иктаж-могай пашамэртара мо?
А. Проскуряков.
Медведево посёлко.
Йодышлан Медведево районын прокуроржын алмаштышыже Р.А.Голиков вашештен:
— Преступлений лийме годым, айдемын тазалыкшылан моральный эҥгек ышталтын але погыжым шолыштыныт гын, эҥгекыш логалше еҥ титакым ыштыше деч окса компенсацийым йодын кертеш. Тидлан тудо исковой йодмашым возышаш.
Тидын годым, РФ Уголовный кодекс дене келшышын, гражданский иск шотышто приговорым шуктымо але погым конфисковатлыме амал дене следователь (дознаватель) суд ончылно титаклыме еҥын погыжым арестоватлыме шотышто ходатайствоватлышаш.
Потерпевшийын праважым арален налме дене кылден, жапыштыже тудын роскотшым петыраш манын, Уголовно-процессуальный законодательствым шуктымо шотышто надзор пашам эртарыме годым районысо прокуратур предварительный раследованийым эртарыше орган-влакым преступникын погыжым рашемдымашке да арестоватлымашке пашаштым виктара. Мутлан, тений гына прокурорын пунчалже почеш Медведево районышто 18 следователь ден дознавательым тидын шотышто мут кучаш шогалтыме.
Ийготыш шудымо-влак шотышто
Ийготыш шудымо йочам порнографийым ыштымашке ушымылан мут кучаш шогалтат мо?
М.Тарасова.
Медведево посёлко.
Йодышлан Медведево районын прокуроржын алмаштышыже Р.А.Голиков вашештен:
— РФ-н Уголовный кодексше дене келшышын, фото-, кино- але видеосьемкым порнографий материаллан ыштымашке ийготыш шудымо икшывым ушымылан гражданиным 3-10 ий мартежаплан эрык деч посна коден кертыт. 14 ийыш шудымо кок але утларак икшыве лийын гын, титакан еҥым 15 ий мартеат эрык деч посна коден кертыт. Тыгай случай нерген пален налше-влак тыдын шотышто полицийын лишыл отделенийшкыже увертарышаш улыт.
С.Носова ямдылен.
