ЯЛОЗАНЛЫК

Игече веле чаракым ынже ыште

Кызыт республикысе озанлыклаште икияш пырчан да отызан кушкылым ӱдымӧ паша кая. Кокланже йӱр йӱрмӧ дене игече чаракым ышта гынат, тусо пашаеҥ-влак йӱд-кече манме гай пасулаште тыршат.

У Торъял районысо кугу кӱкшытыш шушо да кумдан палыме «Первый май» озанлыкыштат пасу паша шолеш.

Тушко ме 19 майыште мийышна. Ты кечын эрдене эрак кече шыратен ончаш тӱҥалын ыле, сандене ятыр пасуштышт ӱдышӧ техникым, пырчым да ӱяҥдышым кондышо машинам ужна.

Эн ончычак ме икымше бригадын агрономжо Ольга Небогатикова дене пырля Семисола ял шеҥгелсе пасушко мийышна. Тушто кукурузым ӱдат ыле. Ты ужашыште пашам пытарымешке ик изирак ужаш веле кодын да ты сомылым шуктышо механизатор эсогыл фотографироватлалташ тореш лие – тунар писынрак мучашлынеже ыле, витне…

Тушнур ял воктене гын икияш культурыш минеральный ӱяҥдышым пуат ыле. Мийымына годым тудым ешарен пышташ лач гына пасу тӱрыш толыныт ылят, пиалеш, почешышт «поктен кудалышташ» ыш логал. Тиде, кумшо бригадын, пасуштыжо чылаже 1800 гектарыште тудым шавышаш улыт гын, ты жаплан 275 гектарыште пашам ыштен шуктеныт ыле.

Тыште теве мо шинчалан перныш: пашам ыштыше-влак кокла гыч коктынжо самырык рвезе-шамыч улыт ыле! Тугеже тыште рвезе калык неле да лавыран, пуракан паша деч огеш лӱд, адакшым озанлыкат самырык-шамычым кумылаҥден мошта, лектеш…

Мемнан кайымекына, кечывал лишанрак йӱр тӱҥалын. Тудо пасу пашам умбакыже шуяш чаракым ыштен гынат, «Первый май» колхозын тӱҥ агрономжо Анатолий Курбатовын палдарымыж почеш, 20 майлан налмаште, колхоз мучко чылаже 6049 гектар кумдыкышто икияш да пырчан культурым ӱден шуктеныт. Тышеч 1931 гектарыш – шожым, 3191 гектарыш – шыдаҥым, 695 гектарыш – рапсым, 432 гектарыш – викым, 261 гектарыш – шӱльым, 234 гектартыш – пурсам. Нине культурым палемдыме тӱрыс кугытым, 100 %-ым, ӱденыт. А теве икияш шудо 695 гектар кумдыкым айлышаш. 20 майлан налмаште пелыж деч изи утларак, 350 гектарышкыже, ӱденыт. Эше тынарракак кодын. Кукурузлан  590 гектарым ойыреныт. Тышеч 537 гектарышкыже ӱденыт да ынде 53 гектар веле кодын.

Икияш культурыш ешартыш кочкышым пуымым ончалаш гын, колхоз мучко тиде пашам 5383 гектар кумдыкышто ыштыман. 20 май марте 940 гектарышкыже ӱяҥдышым шареныт.

Шошо кече идалыкым пукша, ойла калык. А эше тыгай ой уло: «Шошо пашам изилан шотлет – шыжым кугун йоҥылыш лият». Сандене, йоҥылыш лияш огыл манын, республикысе озанлыклаште кажне гана игече тӧрланымым веле вучат да пасу пашам умбакыже изин-кугун вашкен шуяш тыршат.

Любовь КАМАЛЕТДИНОВА

М.Скобелевын фотожо

   

   

       

Опубликовать в Одноклассники

Добавить комментарий