Эртыше кечылаште 2019-2020 тунемме ийым мучашлыме шотышто Россий Просвещений министерствын представительышт дене совещаний лийын. Тудын иктешлымашыж негызеш Марий Эл образований да науко министр Наталья Адамова официальный увертарымашым ыштен.
9-ше класс-влаклан экзамен ок лий
Тудын ойлымыж почеш, общеобразовательный организацийлаште 9-ше классым тунем пытарыше-влаклан тений экзамен огеш лий. Ушештарена, тидын деч ончыч нунылан обязательный семын руш йылмым да математикым палемдыме ыле. Но, чылажымат уэш-пачаш каҥашымеке, специалист-влак ик ойыш шуыныт: йоча-влакын аттестатышкышт оценке идалык мучко тунеммыштым шотыш налын шындалтеш.
Вузышто тунемнет гын, ЕГЭ-лан ямдылалт
11-ше классым тунем пытарыше-шамыч шотышто ойлаш гын, Иктешлыше кугыжаныш экзаменым умбакыже вузышто шинчымашым погаш шонышо-влак гына кучаш тӱҥалыт. Молыжо аттестатым иктешлыше сочиненийым (изложенийым) сайын возымеке веле налын кертыт. Тидын деч вара выпускник кыдалаш профессионал образованийым пуышо тӧнежыш – техникумыш але колледжыш – тунемаш пурен кертеш.
– 11-ше классым тунем пытарыше-влак кокла гыч умбакыже вузышто шкан келшыше профессийым налаш шонышо мемнан республикыште, ончылгоч шотлымаште, 80 процент наре лийшаш. Нунылан ЕГЭ тений июньын кокымшо пелыштыже але июль кыдалне лиеш. Экзаменым эртарыме шотышто Россий Федераций Роспотребнадзорын, Просвещений министерствын специалистше-влак икмыняр темлымашым ямдыленыт. Шинчымашым тергыме кечын эпидемий ваштареш виктаралтше чыла мерым приниматлыман: экзаменыш пурымо годым дистанцийым шотыш налман, йочан температуржым висыман, класс пӧлемым южтарыман, выпускник-влак парт коклаште икте-весе деч зигзаг семын вераҥшаш улыт. Чыла тидлан Марий Элыште ямдылалташ тӱҥалме, – каласен министр.
ЕГЭ-н кӱлешлыкше могай?
Тӱняште, элна мучко, республикыште лийше тачысе сӱретлан кӧра, можыч, Иктешлыше кугыжаныш экзаменжымат эртараш ок кӱл, маныда? Тиде йодышлан Наталья Адамова тыге вашештен:
– ЕГЭ вузыш тунемаш пурымо годым абитуриент-влак кокла гыч ик эн келге шинчымашаным ойырен налаш полша. А вич баллан школ оценке тудын шинчымаш келгытшым тичмашнек почын пуэн огеш керт.
Каҥашымаш умбакыже шуйна
Содыки, Иктешлыше кугыжаныш экзамен лиеш, но кушто да кузе? Кызытеш икмыняр вариант уло, но каҥашымаш эше умбакыже шуйна, сандене Россий Просвещений министерстве ты шотышто эше увертарен огыл.
Марий Элыште таче кечылан ЕГЭ-м эртарыме 25 пункт уло.
– Экзаменым эртараш ямде улына: видеэскерымаш системе пашам ышта, организатор-шамыч вучат, дезинфекцийлан ямдылалтме, технике шотышто нелылык уке. Икманаш, тыгай форматлан ме тӱрыснек ямде улына. Экзаменым эртарыме жапым кусарымылан кӧра июльышто отпускыш каяш шонышо педагог-влаклан тидым варарак ышташышт логалеш, – палемден министр.
Чылалан вер сита
Илышыште чылажат лийын кертеш, кунамже ончылгоч шотлымат чыныш ок лек. Мутлан, выпускник-влак кокла гыч колледжыш але техникумыш тунемаш пурышо-влак шукырак лийыт гын? Тидлан Наталья Васильевна тыге вашештен:
– Тыгай сӱрет лиеш гын, верым шукемдаш палемдыме. Тидын шотышто тургыжланаш амал уке.
ВСТАВКЕ
Марий Элыште 2019-2020 ийласе тунемме идалык 3 этап дене мучашлалтеш:
15 майыште – 1-4-ше класс-влак;
22 май марте – 5-8-ше класс-влак;
29 май марте – 9-11 класс-влак.
У тунемме ийланат ямдылалтман
Июнь гыч республикысе чыла общеобразовательный организаций шушаш у тунемме ийлан ямдылалташ тӱҥалеш. Каласыман, национальный проект-шамыч дене келшышын, тений кеҥежым ялысе школлаште 7 спортзал уэмдалтшаш, 6 школым капитально олмыкташ палемдыме, 2 школ чоҥалтеш, тыгак «Кушмо точко» 15 рӱдер почылтеш.
Россий Федераций Роспотребнадзорын специалистше-влак шушаш тунемме ийлан у темлымаш-влакым ямдыленыт да шагал огыл. Нунын кокла гыч икмынярже, мутлан, тыгай улыт:
– кажне школыш пурымаште кидым дезинфицироватлаш антисептикан дозатор лийшаш;
– кажне классым обязательно южтарыме жап.
Мутат уке, южо темлымаш ача-ава, тыгак педагог-влак коклаште умылыдымашым луктеш. Мутлан:
– перемен жапыште ик классыш коштшо йоча весе дене кылым кучышаш огыл;
– классыште йоча-влакын чотыштым шагалемдаш.
Икманаш, йодыш шуко, а эн чотшо – столовыйышто кочмо шотышто, перемен жап шотышто.
– Туге гынат кӱлеш мерым приниматлыме, сандене ме нуным шуктышаш улына. Конешне, ме сайлан ӱшанена, но чылалан ямде улына, – каласен министр.
Г.КОЖЕВНИКОВА
