19 майыште Марий Элым вуйлатыше Александр Евстифеев Россий президент Владимир Путинын экономикылан да социальный сферлан полшымо шотышто приниматлыме мере-влакым илышыш пуртымылан пӧлеклалтше видеосовещанийыштыже участвоватлен.
Элым вуйлатыше медик-влаклан полшымо шотышто тылеч ончыч лукмо пунчал-влак нерген ушештарен. Тыге, мартыште кумылаҥдыше выплатым идалык мучаш марте тӱлаш палемдыме. Тылеч посна президент поснак лӱдыкшӧ да неле условийыште пашам ыштымылан апрельыште, майыште да июньышто пашадарыш ешарен тӱлаш пунчалым луктын. В.Путинын рашемдымыж почеш, палемдыме чыла выплатым тӱлашлан регионлашке 50 млрд. утла теҥгем колтымо.
Россий президент увертарен: у коронавирус инфекциян пациент ден инфицироватлалтын кертме лӱдыкшӧ тӱшкаш пурышо-влаклан полшышо медик-шамычлан кумылаҥдыше выплатым тӱлымӧ дене кылдалтше проблеме правительствын документыштыже рашыжак огыл умылтарымашлан кӧра лектын. Тидлан кӧра В.Путин кучем-влаклан медперсоналлан ешартыш выплатым тӱлымӧ шотышто лекше ситуацийым мониторитлаш кӱштен, тыгодымак колтымо оксан кӧлан да молан палемдалтмыже чылалан раш лийшаш манын. Нине йодыш-влак нерген чыла уверым калык деке намиен шуктымо да радамын умылтарыме.
Совещанийыште тыгак коронавирусын пандемийже пагытыште граждан-влаклан полшымо моло мере нерген мутланеныт. В.Путинын палемдымыж почеш, 3 гыч 16 ияш марте икшыве-влаклан тӱлаш пунчалме 10 тӱжем теҥге кугытан выплатым 22 млн. йоча налеш, а кугыеҥ-шамыч дене пырля 50 млн. утла россияниным авалта. Тидлан кучем-влак 200 млрд. наре теҥгем ойыраш палемденыт.
Марий Элын Тазалыкым аралыме министерствыжын данныйже почеш, COVID-19 дене черланыше пациент-влак дене пашам ыштыше медперсоналлан кумылаҥдыше выплатым март-апрельлан тӱлымӧ: ойыртемалтше условийыште да ешартыш нагрузко дене пашам ыштымылан 1145 медпашаеҥлан – 9591,7 тӱжем теҥгем, поснак кӱлешан пашам шуктымылан 729 медицине да моло пашаеҥлан – 34616,8 тӱжем теҥгем.
19 май йотке республикыштына у коронавирус инфекций дене черланыме 1285 случайым регистрироватлыме. Базовый манме показательлан шотлалтше черланыме чотын кугемме писылыкше субъектыште чараклыме мероприятий-влакым кораҥдаш але умбакыже шуяш негыз лиеш.
Пандемийын тӱҥалмыж гыч 18 май йотке республикысе кок лабораторийыште 32232 шымлымашым эртарыме.
Коронавирусан пациент-влаклан полышым пуашлан кандаш медицине организацийыште кислород дене шыҥдарыме 680 койкым шындыме.
Марий Элым вуйлатышын организаций да аналитике виктемжын уверже негызеш М.ИВАНОВА ямдылен
