СПОРТ

Тыгеат тунемаш лиеш улмаш, но…

Коронавирус черын шарлен кертме лӱдыкшылан кєра шуко еҥ дистанционно пашам ышташ тӱҥалын. Тиде йӧныш куснымо южыштлан нелылыкымат луктеш. Мо гынат, тидын дене тӱҥ шотышто туныктышо, тунемше, студент-влак пайдаланат.
– Меат, физкультурым туныктышо-влак, моло семынак дистанционно пашам ыштена. Ӧрмаш, но тиде илыш дене кылдалтын. Мый тунемше-влаклан тӱҥ шотышто ВКонтакте соцсеть гоч заданийым колтем. Тушто мемнан «беседа» группо уло. Заданийым кажне класслан посна ямдылем. Вара нуно арняш ик гана 2-3 минуташ видеом колтат. Йоҥылышым ужам гын, умылтарен возем, – пашаж дене палдара Йошкар-Оласе 19-ше №-ан школышто физкультурым туныктышо, куштылго атлетике дене тӱнямбал кӱкшытан спорт мастер А.Иванова. – Ик велым ончалаш гын, южгунамже спортзалыште урокым эртарыме дене таҥастарымаште, ӱдыр-рвезе-влак кумылын да куанен упражненийым ыштат гай чучеш. Ача-аваштат ушнат. Школышто йогылыкышт коеш, ӧрканымышт шижалтеш ыле. Икманаш, пашам ыштат.
Шке пӧртыштӧ илыше-влаклан куштылгырак. Нуно кудывечыште, яндар южышто физкультурым эртарат. Мыйын ӱдыремат тыгак. Такшым нелылык денат тӱкнаш логалеш. Тидын деч посна нигузе. Мутлан, физкультур урокышто иктаж йоча упражненийым йоҥылыш ышта гын, туныктышо воктекше миен, кузе чын ыштышашым ончыктен кертеш, а дистанционно – садак весе.
Йӧн дене пайдаланен, чыла йочалан теве мом темлем. Тиде лӱдыкшӧ жап эрта гын, тек ӱдыр-рвезе-влак икте-весе дене пырля чумырген, ожнысо семын иктаж модыш дене модыт, куржталыт, тӧрштылыт, яндар южышто шукырак лийыт. Компьютер компьютер дене. Икте весым шижаш ок лий, кӱлеш годым полышат вес семынрак эрта. Тек поро кумыл, икте-весе деке умылымаш ончыкыжымат аралалтын кодыт.
Таза лийза, аралыза шкендам.
Алевтинан Михайловна пелашыж дене кок икшывым ончен куштат. Андрей эргышт МарГУ-што кокымшо курсым тунем пытыра гын, Ирина ӱдырышт – нылымше классым. Ирина ончыч спорт гимнастике дене секцийыш коштын. Кызыт куштылго атлетикыш куснен. Упражненийым шукыж годым шкет ышта, южгунам аваже ушна.

Е.ЭШКИНИНА

   

Опубликовать в Одноклассники

Добавить комментарий