УВЕР ЙОГЫН

Лӱмгече вашеш – пӧлек

Шкенжым пагалыше кажне еҥ экологийнам саемдымашке шке надыржым пыштен кертме нерген палена, очыни. Меат шкенан Марий Турек посёлкыштына кажныже шке садыштына, палисадникыштына, кудывечыштына арулыкым эскерена. Тидын годымак чыланак огыл шке пече вес велне мо ышталтмым эскера да тидым огеш кӱлланат шотла, очыни. Чонна торжаҥын, шинчана сокыррак лийын шол. Санденак диваныште кияш йӧратыше ятыр критикше кычалтылаш гына амалым кычалеш: олыкышто да чодыраште тор шуко, чыла вере шӱкшудо кушкеш, каналташ лекташат нигуш… Айста шоналтена: а кӧ тиде торжым кышка? Шкенан суртпече гыч торжо чодыра посадкыш але олыкыш шке ок кусно вет!
Ятыр тӱҥалме сай пашажат мучашлалтде кодеш. Мутлан, аэродром кумдыкышто школым тунем лекше-влак аллейым шынденыт — сай паша. Но варажым тудым ала-кӧ да эскерышаш, тӱзатышаш: шӱкымат чумырыман, шудымат солыман, кошкышо пушеҥгымат кораҥдыман. А кушто школысо волонтёр-влак улыт? Йырым-йыр ончалаш гын, кидым пыштышашлык, тӱзатышашлык верже ситышын.
Теве Эҥервал ялыште илыше-влак телым ече дене коштмо трассым ыштеныт ыле. Изижге-кугужге ече дене куржталыныт. Теле пытыш, но шкем спортивно шуараш кумыл пытен огыл. Рӱдӧ парк марте торарак. Сандене мыйын скандинав коштмашлан площадкым келыштараш кумылем лектын. Каласыме – ыштыме. Шонымем илышыш шыҥдараш полшаш пелашем йодым. Тудо арня наре посадкыште кукшо укш-влакым кораҥден. Шошым мланде кошкымеке, тазалык алеем дене эртен савырнышым. Келшыше гай чучо гынат, мландыште шуко пӱгыльмӧ кийымылан кӧра йӧндымырак ыле. Сандене пошкудем-влак Анжела Антипова, тудын Руслан ден Аделина икшывыже-влак, Рая Ветошкина да пелашем Юрий Александрович дене пырля нуным шорвондо дене удырен чумырышна. А варыжым эше тушто кийылтше чыла торымат эрыктен шындышна. Ныл кече тыршышна — 100 мешак торым погышна. Посёлкысо администраций мыланна мешакымат, нуным наҥгаяш машинамат ойырен. Тор коклаштыже мо гына лийын огыл: янда, пластик атет, чоҥымо материал деч кодшо настат…
Но паша лектышна ынде мемнам веле огыл куандара. Ынде поселкыштына шкенан «Тазалык аллейна» уло. Тиде тыште илыше-шамычан Кугу Сеҥымашын 75 ияш да республикынан курымаш лӱмгечыштлан сай пӧлек лиеш, шонем. «Марий Эл» газет гоч мый ты пашаште полшышо йолташем-шамычлан кугун тауштынем да молыланат ойлынем: «Пагалыза да йӧратыза шкендам да илыме вердам, торым ида кышке! Поро пашам ышташ вашкыза, вара шкежат умыледа: калыклан пайдам ыштыме дене пиалан лияш лиеш».

Светлана Конышева
Марий Турек посёлко
Снимкылаште: Тазалык аллей Тыгай мешакше шӱдышкӧ погынен

      

   

Опубликовать в Одноклассники

Добавить комментарий