Марий Элыште майысе пайрем-влак деч вара коронавирус дене черланыше-влак шукемыныт.
Тидын нерген таче, 15 майыште, Марий Элыште у коронавирус инфекцийым кондымым да шаркалымым шижтарыме шотышто оперативный штабын черетан заседанийыштыже Роспотребнадзорын Марий Элысе виктемжым вуйлатыше Светлана Булатова увертарен.
Пандемий тӱҥалме пагыт гыч 15 май йотке Марий Элыште у коронавирус инфекций дене черланыме 1078 случайым, ты шотыштак пытартыш суткаште 45 случайым, регистрироватлыме. Черланыше-влак коклаште 9 процент йоча, 73 процент пашам ыштен кертше калык да 18,2 процент 65 ий деч кугурак граждан-шамыч улыт. 27 процент еҥ инфицироватлалтмыжым нигузеат огеш шиж, 40 процент гражданын черже куштылго формо дене эрта, 27,5 процент черлын тазалыкшым врач-влак «нелылыкын кокла йыжыҥже» семын аклат, 5,2 процент пациент неле состоянийыште.
Марий Элын тӱҥ санитарный врачше республикысе социальный тӧнеж-влакын посна улмо режимыш кайыме йӧныштым сай велым аклен.
Мониторинг пагытыште республикысе кок лабораторийыште у коронавирус инфекций дене черланен кертмылан чылаже 29709 шымлымашым, тышечын 850 шымлымашыжым пытартыш суткаште, эртарыме. Лишыл жапыште тестированийым ыштыме чот ешаралтынат кертеш: регионым вуйлатыше Александр Евстифеев С.Булатован коронавирусым рашемдыме шымлымашым кумылан-влаклан тӱлен эртараш темлымыж дене келшен.
Тазалыкым аралыме министр Марина Панькован палдарымыж гыч, таче коронавирусан пациент-шамычлан полышым пуашлан республикысе кандаш медорганизацийыште 590 койкым шындыме. Тушто суткаште кокла шот дене 310 пациент эмлалтеш.
А.Евстифеев таче кечылан тӱҥ задаче семын предприятийлаште да калык коклаште санитарно-эпидемиологий правил-влакым шуктымым палемден. «Мыланна коронавирус дене инфицироватлалтме 20 случай марте пӧртылаш да вара тиде чотым иземден толаш, а Минздравлан койко фондым умбакыже ешараш кӱлеш», — кӱштен тудо.
Марий Элым вуйлатыше тӱшка транспортышто да ужалыме точкылаште коронавирус деч аралалтме йӧн-влакым шукташ кӱлмылан тӱткышым ойырен. «Указ дене келшышын, чараклыме мероприятий-влак шушаш шочмо гыч эше кок арня вийыште лийыт. Ме тудым шуктена гын, документым умбакыже шуйымо огеш кӱл. Ӧрканена, да инфекций маске деч посна коштшо-влаклан да черланыше-шамыч дене кылым кучымылан кӧра умбакыже шарла гын, тугеже вес пунчал лиеш. Торговльын тӱрлын пашам ыштымыжым чылан палена: южо кевытыш маске деч посна огыт пурто, молан манаш гын шкештат маске дене пашам ыштат, а южо вере ниможат шотыш огеш налалт. Сандене мемнан задачына – указым умбакыже шуяш огыл манын, инкубаций пагыт гай кок арняште коронавирус деч аралалтме мере-влакым кӱлынак шукташ», — каласен республикым вуйлатыше.
Оперштабын заседанийыштыже тыгак у коронавирус инфекций шарлыме пагытыште калык ден предприятий-влаклан окса дене полшымо йодышым лончыленыт. Граждан-шамычлан темлалтше услуго-влак нерген докладым Россий сбербанкын Марий Элысе 8614-ше №-ан отделенийжым вуйлатыше Арсений Колобов ыштен.
Марий Элым вуйлатышын организаций да аналитике виктемжын уверже негызеш М.ИВАНОВА ямдылен
