Таче, 15 майыште, композитор, СССР Кугыжаныш да Ленинский премий лауреат, СССР-ын калык артистше Андрей Яковлевич Эшпайын шочмыжлан — 95 ий.
Землякнам да тудын марий искусствым вияҥдымашке надырым пыштымыжым Марий Элыште илыше-влакат сайын палат да шкенжымат порын шарнат.
Эшпайын шочмо кечынже Марий Эл правительстве председательын икымше алмаштышыже Михаил Васютин ден республикын тӱвыра, савыктыш да культур паша шотышто министр Константин Иванов И.Палантай лӱмеш тӱвыра да сымыктыш колледжыште, А.Эшпай лӱмеш Кугу концерт зал пелен Андрей Яковлевич лӱмеш улшо мемориал оҥа пелен пеледыш аршашым пыштеныт.
Туштак колледжын икмыняр преподавательже лийын. Тыгодым РСФСР-ын сулло артистше Виталий Шапкин Эшпайын возымо пьесыжым флейтыж дене шоктен.
— Андрей Яковлевич — мыйын илыш йолташем. Мыланем тудо флейте дене шокташ кум произведенийым возен да пӧлеклен коден, — каласыш уста флейтист Виталий Шапкин. — Эшпай – марий калыкын кугу талешкыже, сандене тыгай еҥын лӱмжым мондыман огыл. Андрей Яковлевичым икымше гана Йошкар-Олаште 1960 ийлаште ужынам, а варажым семӱзгарым шоктымем 1970 ийлатше колледжыште концерт залыште ужын. А Моско консерваторийыште тунемме годым Виталий Алексеевын произведенийжым шоктымем колын. Тунам тудын дене кумшо вашлиймаш лийын. Тунем пытарымеке, Йошкар-Олаш толмеке, Андрей Яковлевич дене чӱчкыдынрак вашлийынна. 1983 ий гыч йолташ семын келшаш тӱҥалынна. Тунам мемнан пачерыш телефоным шындышт, санден варажым икте-весе деке шуко гана йыҥгыртенна. Эшпайын «Концертшым» 17 гана шоктенам, пытартыш гана тудын возымо произведенийже 2013 ийыште Козьмодемьянскыште йоҥген. А шкенжын йӱкшым пытартыш гана 2014 ий декабрьыште колынам.
А.БАЙКОВА
Фотом Минкультурын пресс-службыж гыч налме
