Марий Элыште ик парк директорым должностной полномочийже дене утыждене пайдаланымыжлан да оксам арам кучылтмыжлан титаканлан шотленыт да судитленыт, палдара РФ Следствий комитетын Марий Элысе следствий управленийже.
Следствийын шонымыж почеш, Йошкар-Оласе каныме да тӱвыра рӱдӧ паркын директоржын алмаштышыже, документыш кидпалым шындаш праваже укеат, вуйлатышыжлан «Парк «Мир развлечений» ООО дене йӱкым кугемдыше (звукоусилительный) аппаратурым рынке ак деч шергыракын пуаш да тидлан оксам тӱлаш йодмашан ойпидышым ышташ темлен. 2014 ий июль гыч 2019 ий май марте чылаже 5,5 миллион утла теҥгелан 88 договорым пеҥгыдемденыт. Тыге коктын парклан 2 миллион утла теҥгеаш эҥгекым ыштеныт.
Тылеч посна алмаштышыжын темлымыж почешак парк директор 2014 ий февраль гыч 2019 ий апрель марте кӱлшӧ ойпидышым ыштыме деч посна индивидуальный предпринимательлан офис пӧлемым да гараж боксым арендыш пуэн. А тидлан оксажым «Парк «Мир развлечений» ООО-шко пуйто рекламе акцийым эртараш йӱкым кугемдыше аппаратурым пуымо семын тӱлаш темлен. Тидлан кӧрат парклан 2 миллионат 400 утла тӱжем теҥгеаш эҥгек ышталтын.
Преступлений ышталтмым Россий ФСБ-н Марий Элысе управленийжын пашаеҥже-влак пален налыныт.
Тиде уголовный дела почеш ятыр документым поген налыныт. Нуным следователь да 2 оценочный, экономический, почерковедческий экспертизе шымленыт, 40 утла свидетельым йодыштыныт. Следовательын ходатайствыж почеш парк директорын автомашинажлан да пачер ужашыжлан, тыгак тудын алмаштышыжын мланде участкыжлан арест пышталтын. Уголовный делан материалже чылаже 14 томыш чумырген.
Суд парк директорым 2 ий да 3 тылзылан эрык деч посна кодаш, 200 тӱжем теҥге штрафым тӱлыкташ пунчалым луктын.
Директорын алмаштышыже шотышто уголовный дела кызыт судышто ончалтеш.
Л.КАМАЛЕТДИНОВА
