Роспотребнадзорын Марий Элысе виктемжын увертарымыж почеш, пандемий тӱҥалме пагыт гыч 15 май йотке Марий Элыште у коронавирус инфекций дене черланыме 1078 случайым, ты шотыштак пытартыш суткаште 45 случайым, регистрироватлыме.
Инфицироватлалтше-влак коклаште
4 йоча – ик ияш марте,
33 икшыве – 1 гыч 6 ияш йотке,
44 йоча – 7 гыч 14 ияш марте,
16 икшыве – 15 гыч 17 ияш йотке,
94 еҥ – 18 гыч 29 ияш марте,
346 граждан – 30 гыч 49 ияш марте,
344 еҥ – 50 гыч 64 ияш йотке,
197 граждан – 65 ий деч кугурак.
Коронавирус дене инфицироватлалтше 1078 граждан кокла гыч 290 еҥ черланымыжым нигузеат огеш шиж, 434 еҥын черже куштылго формо дене эрта, 297 пациентын тазалыкшым врач-шамыч «нелылыкын кокла йыжыҥже» семын аклат, 57 черле неле состоянийыште.
Пандемий тӱҥалме пагыт гыч 15 май йотке Гигиене да эпидемиологий рӱдерын да СПИД-рӱдерын лабораторийлаштышт COVID-19 дене черланен кертмылан чылаже 29709 шымлымашым эртарыме.
15 май жаплан республикыштына 1129 гражданым, ты шотыштак тымарте черланыше але черланен кертын манын шонымо-влак дене кылым кучышо 1117 еҥым, медицине велым эскерат да тыгай учёт гыч 7099 еҥым кораҥденыт.
Эпидемиолог-шамыч рашемдыме чыла случайыште инфекцийын шарлымыж деч кӱлешан мероприятий комплексым эртарат, черланыше але черланен кертын манын шонымо-влак дене кылым кучышо-шамычым еш, лишыл да пашам пырля ыштыше еҥ-влак коклаште пеш чолган рашемдат. Нунын нерген уверым Роспотребнадзорын верысе органлашкышт колтат. Элкӧргӧ паша орган-влакын пашаеҥышт полшымо дене граждан-шамычын изоляций режимым да карантиным шуктымыштым эскерат.
Кызыт поснак кугу тӱткыш тӱшкан пайдаланыме верлам да тӱшка транспортлам дезинфицироватлымылан ойыралтеш.
Роспотребнадзорын Марий Элысе виктемже кызытсе эпидемий жапыште калыклан шуко еҥ улман верлаште веле огыл, тыгак уремыштат у коронавирус инфекций дене черланыме деч маскым чияш темла.
М.ИВАНОВА
