СОЦИАЛ ИЛЫШ ТАЗАЛЫК

«Пашашке толмет веле шуэш»


Советский районысо Кукмарий ялыште у фельдшер-акушер пунктым почмылан эше ик ият уке. Пӱя серыште верланыше йошкарге да ош кермыч дене чоҥымо полат ялыш пурышо кажне еҥын шинчажлан перна. Тӱжвач ончалмаште тудо изиат, кугуат огыл, чатка да мотор, йолын толшылан тротуарым шарыме, транспортан еҥлан стоянкым келыштарыме, коляскым кӱзыкташ да волташ пандусым ыштыме.

Кӱртньӧ омса ончыч пӧртӧнчыл гайыш пурта. Тудо кугу огыл, но волгыдо – уремыш кок окна лектеш. Ошалге плитке дене оптымо кӱварыште икмыняр мужыр йолчием шога: бахилышт укеат, уборщикын пашажым аклен, пациент-влак лавыран калошыштым тышанак кудашын коденыт, шоналтышым. Пырдыж пелен теҥгылым вераҥдыме, тудыжо врач але фельдшер деке черетым вучен шинчышылан, тыгак эмлалт лекме деч вара каналташ шонышылан путырак йӧнан.

– У ФАП-ыште процедурныйлан, смотровойлан, физиолеченийлан, стерилизацийлан, эмым аралаш да пациент-влаклан приёмым эртараш посна кабинет-шамычым ыштымылан кӧра СанПиН йодмо почеш пашам ышташ чыла йӧн уло, – палыме лийме деч вара чонжым почо ФАП-ым вуйлатыше Людмила Губанова. – Тошто медпункт кызытсе школ кундемыште лийын. Тушко корно уке гаяк: йӱраныште – лавыран, порананыште – луман. Коҥгаш шке олтенна, вӱдымат шке нумалынна… А тыште – чыла кабинетым газ ырыкта, шокшо-йӱштӧ вӱд кран дене толеш, эсогыл туалетыш тӱгӧ лекташ огеш кӱл. Чыла у: смотровой кабинетысе оборудованият, йоча ден кугыеҥ электрон виса-влакат, холодильникат, кушеткат, ӱстембалат, шкафат – чыла-чыла!

Людмила Петровна Ваштаршӱштӧ, Кукмарийыште, Мугылышто, Пивактын почиҥгаште, Шуймучаште, Яҥгранурышто да Шанерыште – чылаже шым ялыште илыше 858 еҥым обслуживатла. Тудын деке кече еда 20 наре еҥ коштеш: икте уколым ышташ, весе физиопроцедурым эрташ, кумшо давленийым висаш, нылымше районыш направленийым налаш, визымше поро ой-каҥашым йодаш, кудымшо йочам тергаш… Икманаш, паша кечыгутлан сита.

– Да, паша сита. Приёмым эртарыме, эмлыме деч посна эше документым вӱдаш кӱлеш, сандене пеш шуко возаш логалеш: пациентын картычкышкыже, журналыш. Таче гына 15 еҥлан уколым ыштышым. Мӱшкыран ӱдырамаш ден ик ияш марте йоча-влакын тазалыкыштымат мыяк эскерем. Тыгак план почеш прививкым ыштем. Кундемыштына гипертоний дене орланыше-влак шукын улыт, таче ты чер дене учётышто 36 еҥ шога. Ял калыкым остеохондроз чот витара, нунымат, эмым темлен, уколым ыштен, Алмаг магнитотерапийым палемден, йол ӱмбаке шогалташ тыршем. Шыжым, телым да шошым ОРВИ ваштареш кучедалына. Ялыште утларакше илалше-шамыч илат, ик ияш марте 5 йоча, 17 ияш марте 100 икшыве улыт. Тений икымше кварталыште 32 черле деке мӧҥгышкышт лектын коштынам, ӱмаште идалык мучко – 84 гана. Районысо моло ФАП дене таҥастарымаште мыйын ты чот эре шукырак погына. Тидлан амалжат уло: ме райрӱдӧ деч тораштырак илена.  «Забота» автопоездын, район гыч педиатр ден терапевтын толын коштмыштым пайдалылан шотлем – калык квалифицироватлыме медицине полышым налын кертеш, – ФАП-ын пашаж дене палдара тений Тазалыкым аралыме министерствын «Эн сай фельдшер» конкурсыштыжо кокымшо верым (икымшыжым нигӧлан пуымо огыл) налше Людмила Губанова.

Людмила Петровна шочынжо Киров область Пижан район Марий Ошай ял гыч. Советск оласе медучилищым тунем лекмыж деч вара специальностьшо дене шочмо кундемыштыже паша верым муын кертын огыл. Кукмарий ялыште илыше тукым акаже ӱдырым сулен налме канышыш лекше медпункт вуйлатышым алмашташ ӱжын. Тыге Людмила ешыжге тышке куснен да ынде, очыни, ӱмырешлан лакемын. Ончыч школ пӧртыштӧ да монь иленыт, вич ий ончыч пачерым налыныт.

– Ынде кредитым тӱлен илена, – воштылеш шкеже. – Администраций илыме верым ойырен огыл гынат, тышке толмемлан нимынярат ом ӧкынӧ. Калык сай, ласка, поро. Кундемыштына чыла шотыштат сайын илыше, тыгайжым эше социально благополучный маныт, еш палынак шуко. Мыйын медпункт вуйлатышылан 21 ий пашам ыштыме жапыште уда ешыже лийынжат огыл. Мыланем айдемым эмлаш, айдемылан сай, поро пашам ышташ келша. А тидланже йӧн ынде эшеат шуко уло, – куанжым шылтыде манеш Советский районысо рӱдӧ эмлымверын Кукмарий ФАП-шым вуйлатыше Л.Губанова.

М.ИВАНОВА.

Снимкылаште: Л.Губанова, Кукмарий ФАП.

Авторын фотожо.    

 

Опубликовать в Одноклассники

Добавить комментарий