Илиш районысо Анач ялыште илыше Гузалия Васина самоизоляций пагытыште ик суткаште марий тӱнялан палыме лие. «Латшым ияш» мурым муралтымыже шукылан келшен. Гузель верысе клубышто ият пеле пашам ышта, «вуйлатышат, худрукат, кӱвар мушшат шкеак улам», — манеш.
Ялыштышт фольклор коллектив 1992 ий гыч уло, ынде тудымат вуйлата. А мурымым видеош войзаш амалже тыгай лийын. Клуб пашаеҥ-влак «Мӧҥгыштӧ шинчена» акцийым эртареныт. Районысо тӱвыра пӧлка марла мурым мураш йодын. Кастене верысе калыкын шонымашыжым палаш интернетысе соцальный кылыште улшо ялысе группыш тудым шкежак колтен. А эрлашыжым эрдене шукылан палыме еҥ лийын кынелын. Видозапись ватцап йӧн дене марий калык коклаште писын шарлен. Тӱҥалше мурызылан ятыр вер гыч палымыже-влак йыҥгыртеныт, моктен ойленыт, ятыр ий ужын-вашлийдымыже-влакат тудым муыныт». Интернет, мутат уке, кызытсе жапыште кугу вий!
Гузелиян ойлымыжо почеш, тудо йочаж годымак мураш йӧратен. «Ончыч рушла муренам. Надежда Кадышеван репертуарже гыч муро-влакым ойыренам. Кодшо ийын «Илишевский соловей» районысо муро конкурсыш ушнышым, татарла мурымем дене 2-шо верым налынам. Шуко еҥ мылам ойлен: «Гузель, а молан марла от муро?» Мыйын авам суас, ачам марий, ӱмырем мучко тиде ялыштак илем. «Латшым ий» мурын семже куштылго. Мутшо, мыйын шонымаште, чылаланат келша, вет рвезе пагыт кажнын ушыштыжо ӱмырешлан кодеш да чонжылан лишыл».
Елена ГАЗИНА
Пошкырт кундем
