Ончыкылык илыш кажныжым тургыжландара. Мо мемнам вуча, пален налме шуэш. Йолташ-влак, шоналтыза: шочмыда гыч тӱҥалын пытартыш кечыда марте пӱрымашдам раш возен пуымо книгам кучыктат гын, мом ыштеда ыле?
Тидыже, мутат уке, — йомак, но ты годымак шонаш таратыше йодыш.
Егор Федоров, Йошкар-Ола:
— Мо илышыште лийын, чыла шарнаш огеш лий, сандене лудын лектам ыле. Кӱжгӱ ма але уке, ончалашат оҥай.
Марина Лукиянова, Шернур район:
— Тыгай книгам почашат ом тӱҥал ыле. Молан манаш гын чыла пален налмеке, илышын оҥайлыкше йомеш.
Ольга Изибаева, Татарстан:
— Ом луд ыле. Тек мо пӱралтмым палыде гыч коштам.
Илья Гладыш, Тольятти:
— Эн ондак пытартыш лаштыклам ончалам. Вара, молан тыгай мучаш умылаш манын, тачысе кече гыч умбакыже лудам.
Злата Егорова, Килемар район:
— Ончыкылык – тушто, тек умбакыжымат тыгак кодеш. Почын ончымо, мутат уке, пеш шуэш. Мо тый денет да лишыл еҥет-влак дене лийшашым пален налмеке, кузе илыман? Чыланнанат ик мучаш, тидын дечын шылаш огеш лий. Мылам ӱмыремын пытартыш кечыжым палыде гыч кошташ ласкарак.
Анастасия Богданова, Куженер район:
— Лудаш веле огыл, кидышкемат ом нал ыле. Тек илыш пӱрымашем шке йогынжо дене кая.
О.МОШКИНА