ТОШКАЛТЫШ

Пытартыш йыҥгыр йӱк…

Шошо мучаш да кеҥеж тӱҥалтыш – Россий мучко пытартыш йыҥгыр йӱк йоҥгалтеш. Тиде пеш вучымо пайрем. Куанже могай! Тунем пытарет, ончылно вашталтыш вуча. Тидын годымак пеш шӱлык – лишыл йолташ, йöратыме туныктышо дене чеверласыман.

Тачысе лаштыкын унажат вашке тунемме вер гыч тыныслык кайык семын чоҥештен кая. Мутем Марий кугыжаныш университетын выпускникше, Анастасия Галиева нерген. Тудо марий кундемыш Татарстан республик Актаныш район Йӱштӧ Памаш ял гыч тунемаш толын.

— Настя, студент радам гыч лекташ ямде улат?

— Йочасад да школын выпускникше лийынам, а кызыт ынде университетым тунем пытарем. Иктаж кок ий ончыч: «Кунам тиде жап эрта, лучо пашам гына ыштем, тунем ноенам», — манын шонем ыле. Кызыт тиде мутем дене йӧршеш ом келше.

Тунеммаш, сессий, йолташ-влак, тӱрлӧ-тӱрлӧ кумыл… Чыла тидым мый кажне гана вученам. А ынде умбакыже мо лиеш, мо вуча? Ончыч кугу ӱшан дене мый шочмо Татарстан кундемышкем вашкерак пӧртылаш шоненам. Шочмо вер эре шкеж деке шупшеш. А кызыт Йошкар-Олаш кодаш але Татарстаныш каяш – тиде йодышлан раш вашмутем уке. Магистратурышто шинчымашем нӧлташ шонем, студент радам гыч лекмем ок шу (шыргыжеш).

— Тунемаш Марий Элыш кузе логалынат?

— 9-ше классыште тунемме годым Озаҥ олаш шочмо йылме да литератур олимпиадыш миенам. Тушто Марий кугыжаныш университетын туныктышыжо-влак: Галина Никитьевна Бояринова да Светлана Александровна Малинина дене вашлиймаш эртен. Нуно институт нерген пеш оҥайын каласкаленыт, тидын деч вара Йошкар-Олаш тунемаш каяш кугу кумыл лектын.

— Тый университетыште икымше курс гычак активист лийынат, тиде корным кузе ойырен налынат?

— Школыштак «Эрвий» йоча организацийыште шке вием тергенам. Университетыш пурымеке, активист илыш дене чеверласен кертын омыл. Садлан умбакыжат тиде илыш-корным ойыренам. Мутат уке, икымше верыште – тунеммаш, а вара конкурс, мероприятий, волонтер паша. Мӧҥгыш шуэн коштынам, садлан каныш кечылаште яра жапем шуко лийын. Курс гыч курсыш опыт погынен, тунеммаш ден мер пашалан жапым чын ойырен мошташ, кок аланыштат чыла пашам шукташ йӧным муынам. 3 курс гыч пашам ышташ тӱҥалынам. Тунеммаш да пашалан кӧра шуко олалам ужынам: Санкт-Петербург,

Моско, Ульяновск, Самара, Ижевск, Пермь да тулеч молымат. Университетыште тунемме годым кугу шинчымашым налат, да эн тӱҥжӧ «мобильный» койыш вияҥеш. Ик верыште гына шып шинчен ом мошто.

— Студент илышыште мо эн шерге, мо курымешлан тыйын чоныштет кодеш?

— Тиде жап нигунам ок мондалт. У йолташ-влак… Нунын дене вич ий коклаште пырля воштылмат, шортмат, куанымат. Сессий пагыт… Чынжым ойлаш гын, неле гынат, пиалан жап. Йÿд мучко тургыжланет, а эрлашыжым, визытан отметкым налмек, чон куан ден темеш. Мужыр тÿҥалмешке пырля тунемше ӱдыр-рвезе-влак дене муренна, куштенна, воштылынна. Тÿрлыжат лийын. Марий кугыжаныш университетын администрацийжылан, шергакан туныктышыжо-влаклан кугу таум ойлем.

— Тау, Настя. Ончыкылык корнет волгыдо лийже!

— Тау!

О.МОШКИНА

Опубликовать в Одноклассники

Добавить комментарий