Волжский район Моркыялыште вӱд толмым чарнымылан кӧра кум ялыш вӱдым пурташ регион вуйлатыше А Евстифеев Марий Эл правительствын резерв фондшо гыч кок миллион теҥге наре оксам ойыраш кӱштен.
Кызыт у скважиным ыштат. Тыге Моркыял, Красный Горко да Куптӱр яллаште илыше-влак вӱдым пуртымо шотышто орланаш огыт тӱҥал.
– Терген лекмеке пале лийын: кызытсе скважине дене вӱд кӱлеш семын ок тол, а у скважине тиде экшыкым кораҥдышаш. Тудын келгытше – 72 метр лиеш. Таче кечылан 50 метр утла эртыме. Кум кече гыч пургедмым чарнат да водопровод дене ушаш, чыла пашам кӱлеш семын мучаш марте шукташ эше ныл кече кӱлеш. Калыклан вӱдым пуат, – увертарен А.Евстифеевлан республик правительстве председательын икымше алмаштышыже А.Сальников.
Е.ЭШКИНИНА
