11 майыште Россий президент Владимир Путин элнан субъектлажым вуйлатыше-шамыч дене санитарно-эпидемиологий сӱрет, калыклан полшымо у мере-влак да экономике йодышла шотышто совещанийым эртарен. Тудо 12 май гыч пашам ыштыдыме жапын пытымыже, чараклыме мере-влакым луштараш тӱҥалме, но посна улмо режим гыч писынжак огыл лекме нерген палемден. Тылеч посна йочан еш ден социальный да педагогический пашаеҥ-влаклан окса дене полшымо указше дене палдарен. Тудын дене келшышын, 15 апрель гыч 15 июль мартесе пагытыште, мутлан, социальный тӧнежлаште пашам ыштыше врач-влаклан кок арняш сменыштлан 40000 теҥге, коронавирусан черле-шамычлан полышым пуышо врач-шамычлан 60000 теҥге дене ешарен тӱлышаш улыт.
Россий правительстве председательын пашажым шуктышо Андрей Белоусов 12 майыште медик-влаклан кумылаҥдыме выплатым пуымо нерген распоряженийыш кидпалыжым пыштен. Тыге, Российын федеральный бюджетше Марий Элысе медик-шамычлан коронавирус инфекциян черле-влак да лӱдыкшӧ группылан шотлалтше ойыртемалтше пашам кугу нагрузко дене шуктымыштлан кумылаҥдыме шотан выплатым тӱлашлан 31 833 200 теҥгем колташ палемден.
— Таче мемнан республик веле огыл, уло тӱня кугу нелылыкыш логалыныт, — медик-влаклан кугыжаныш велым полшымо мере нерген шонымашыж дене палдара Йошкар-Оласе 1-ше №-ан медико-санитарный частьын поликлиникыштыже учаскысе терапевтлан ыштыше Диана Игорьевна Брендина. – Калык кече еда кола… Медицине университетым тунем пытарыме деч вара пашам икымше ий гына ыштыше да коронавирусын пандемийже пагытыште инфекций дене кучедалме икымше радамыш логалше самырык специалист семын палемдем: тазалыкым аралыме сферыште нелылык лийын, уло да лиеш. Но калыкым лийме семын шагалрак йомдарен, неле йодышым писынрак рашемдаш кӱлмӧ пагытыште ме, медик-влак, пеҥгыде радам, чатка алгоритм почеш пашам ыштена. Йӱдым ма кечывалым, шочмын ма рушарнян, медицине организацийыште ма тудын деч ӧрдыжтӧ, неле ма куштылго жапыште – эре айдемын тазалыкшым да илышыжым арален кодымо верч шогена…
Россий президент Владимир Путинын коронавирусан пациент-влак дене пашам ыштыше медик-влаклан кумылаҥдыме выплатым тӱлымӧ нерген указшым сайлан веле огыл, утларакше кӱлешанлан шотлем. Нине еҥ неле условийыште веле огыл, тыгак тазалыкыштлан да илышыштлан лӱдыкшӧ кумдыкышто пашам ыштат. Тидым чыланжак огыл чытен кертыт. Тӱҥжӧ – палемдыме окса иктаж-вере ынже лакем але иктаж-кушто ынже катыкем, а лачшымак у коронавирус инфекций дене кучедалме икымше радамыште улшо медик-шамычлан толын шужо.
М.ИВАНОВА
