СПОРТ

Куржам мый куржам ече дене…

Йошкар-Ола воктенысе «Корта» ече базым таза илыш-йӱлам кучышо да кугу спортыш ушнышо еҥ-влаклан моткоч сайын келыштареныт. Таче кечылан ече спортым вияҥдаш тушто чыла йӧным ыштыме. Эн ончыч тул дене волгалтарыман ече-роллер трассым палемдыман. Тыгак тушто жапым пайдалын эртараш унагудо, тренажёр, спортзал да молат улыт.
Таче лудшо-влакым шинчалан перныдыме, но ече спортым вияҥдаш пеш кугу шӱкалтышым ыштыше паша да ты тудым шуктышо еҥ нерген. Тиде – жапше годым тале ечызе, а кызыт ече «эмлызе» манаш келшен толеш, Василий Гаврилов.

«Ече эмлызе»
«Корта» ече базышке мийымекем, шкешотан «ече эмлызе» деке ик гана лўмынак пурен лектым. Мастерскойышто шинчалан вигак станок перныш. Йырым-йырже тӱрлӧ форман утюг, кӱзӧ, щётко, мазь, порошок ате…
– Шкежат ик гана веле огыл ужында. Теве тиде мемнан ечым ямдылыме мастерской. Тыште чӱчкыдынак спорт мастер Альберт Ямалеевым ужаш лиеш. Тудат мыланна полша. Мемнан икмыняр станок уло, – ончыктен, ончыктен, умылтара Василий Гаврилов. – Ечым таҥасымашлан сайын ямдылен шукташ тӱрлӧ инструмент кӱлеш. Теве щёткыжак мыйын куд тӱрлӧ уло. Парафиным левыкташ утюгымат температурым шотыш налын кучылтына. Парафинжат йӱштӧ да леве кечылан келшыше.
Василий Геннадьевич йоча ден куграк-влаклан (кє зачёт але ГТО-м сдатлаш толеш) ечым ямдыла. Южгунам кечеш 20-30 мужырым ыштен шукта гын, таҥасымаш але организаций зачётым сдатлыме годым нылле мужыр мартеат шуэш. Тиде пашалан тудо 2005 ийыште кумылаҥын. Ече базе, мастерской, ынде тудлан кокымшо суртшо гай лийын шуктен.
– Ечыжат качестве шот дене тӱрлӧ. Акше сайракшын 20-50 тўжемыш шуэш. Такшым тыште чылалан сита: тыглай мунчалтен кошташат, профессионал семын куржталашат, прокатыш пуашат. Ме палена: комплект завод гычак шке сӱрет дене келыштаралтше толеш. Сӱрет пыта гын, ме ечеш парафиным йыгена, южгунам икмыняр лончым пыштена.
Мутат уке, кӱжгытшӧ огеш ешаралт, но аралтыш лиеш. Ечым ончыч мушман, вара парафиным пыштыман, тылеч вара эмульсий да порошок дене петыраш кӱлеш. Икманаш, чылажымат шотыш налын ыштыман. Южгунамже 4-5 лончымат ышташ логалеш. Такшым тидын шотышто оҥаят лиеда. Ик еҥ толынат, «Ечым шӱкшын ыштенат. Курык гыч моткоч писын вола, а курыкыш кӱзымӧ годым моло деч почеш кодам», – манеш. Рашемдымеке, пале лие, шкеже идалыкыште улыжат кок гана веле ече ӱмбаке шогалын. А весе, мӧҥешла, «Ечым локтылынат. Моткоч писын кая, шот дене шогалынат ом керт», – манеш. Профессионал-шамыч вес семынрак ончат. Ме тӱрлӧ йӧным кычалына: ечым ямдылыме, игечым эскерыме деч посна эше лумым кучен, терген ончаш логалеш. Тудыжо южгунам моткоч ночко лиеш. Тыгай годым ечым йӧршеш вес семын ямдылыман. Икманаш, тиде пашан шке секретше, ойыртемже моткоч шуко. Тидым тренер, спортсмен-влак палат. Такшым тренер-влак шкештак воспитанникыштлан сайын ямдылат. Мутлан, Сергей Кугергин, Вячеслав Еменгулов, Евгений Рыбаков, Дмитрий Сергеев… Йоча-влакымат туныктена.
Василий Геннадьевич опытымат поген шуктен. Кызыт сай специалист, ече олмыктышылан шотлалтеш. Шукышт лач тудын ыштымыжым гына вучат, ечыштым Василийлан гына ўшанат.

Кече лектеш – ончалеш…
Оҥай, конешне, но ечым спортсменлан таҥасаш тӱрыс ямдылымекат, йєндымылыкыш логалаш лиеш. Молан? Стартыш ик тӱӱлӧ (мцтлан, ночко) лумлан да игечылан келшыше ече дене лектеш, а куржмо годым я лум лумаш тӱҥалеш, я кенета писе да йӱштӧ мардеж пуалеш, я кенета кече ончалеш, игече левешта… Тыгодым спортсменын ечыже «чыгынаш» тӱҥалеш, але – мӧҥгешла. Тидым шотыш налын, йот элысе спортсмен-влак таҥасымаш деч ончыч иканаште икмыняр ечым ямдылат да куржмо годымак, кўӱеш гын, ечым вашталтат.Марафоныш – уло кумылын
Василий Гаврилов – таче кечылан ече дене марафонышто вийым тергыше ик чолга да тале спортсмен. Идалык ончыч икмыняр ечызе чумырген, «Йошкин ЛОСЬ» клубым почыныт. Ты клубын спортсменже-шамыч ече дене тӱрлӧ марафонышко лектыныт. Мутлан, март кыдалне йӱлаш пурышо «Европа-Азия» таҥасымаште участвоватленыт. Тудыжо Свердловск обастьыште лийын. Марафонышто чылаже 468 еҥ вийжым терген.
Ечызе-влак эрыкан йєн дене 50 километр кужытым эртеныт. Марий Эл гыч Василий Гаврилов 58-ше, а Сергей Лебедев 64-ше лийыныт. Нунын деч ик минут ончыч финишыш теле Олимпиадын бронзо призёржо-влак Антон Шипулин ден Иван Алыпов толыныт.
– Ты марафонышто командына чылан гаяк вийыштым тергеныт, манаш лиеш, – ойла Василий. – Тушто Рауль Шакирьянов ончыко лектын. Ончыч тудо Российын сборный командыжын чапшым арален. Марафонышто моткоч шуко лӱмлӧ спортсмен-влак таҥасеныт. Биатлонист Антон Шипулин Марий Эл гыч мийыше ечызе-шамычым видеош войзен. Мый тудым номерже гыч палышым. Сергей Лебедев, шуко шоныде, тудын дене селфим ышташ йодо. Шипулин келшыш. Мемнан пеленна смартфон лийын огылат, тудо шкеак видеом ыштыш. Антон Шипулин дене пырля ечым йӧратыше-влак 2-2,5 километр кутышым пырля куржынна. Варажым тудо умбаке чымалте. Ямдылалтме кўкшытшє дене тудо моло деч палынак ойыртемалтеш. Профессионал!

 
«Йошкин ЛОСЬ»
Йошкар-Олаште «Йошкин ЛОСЬ» клубым спортсмен-влак ече дене марафонышто вийым тергаш шонымаш дене почыныт. Клубыш логалаш ечызе кок гана марафонышто (50 км) вийым тергышаш.
– Клубнан шке формыжо уло. Тидын шотышто спонсор-влак полшеныт. Флагымат келыштаренна. Кужэҥер район гыч Григорий Морозов логотипым сӱретлен келыштарен. А посна лӱмым пуаш шонымаш ончычак лийын. Тудым ме Йошкар-Ола дене кылдалтше лийже манын шоненна. «Йошкин кот» – куштылго атлет-влакын, «Йошкин конь» – триатлонист-шамычын, а мемнан?.. «Йошкин ЛОСЬ» шонымаш пурыш. Тидын дене молат келшышт. Шордо – писе янлык, – ойла Василий Гаврилов. – Мемнан тӱҥ шонымашна – ече спортым вияҥдаш, таҥасымашым эртараш, калыкым тӱшка спортлан кумыландаш.
Таче кечылан ты клубышто индеш еҥ шотлалтеш.Уэш ечыгорныш
Лум возеш веле, Василий – кажне кечын, манаш келшен толеш, «Корта» ече базыште. Поро пӧръеҥ тӱрлӧ кундемлаште эртаралтше марафонлаште вийжым терга. Ик жап чарныме гай лийын, но… Єрдыж кундемлаште эртыше марафоныш лекташ Василийым Олег Сергеев кумылаҥден. Тидыже 2006 ийыште лийын. 33 ияш Олег шкежат ечылан шӱмаҥаш веле тӱҥалын улмаш. Василийлан тиде темлымаш келшен. Тыге команде кужу дистанцийыште вийым тергат. Результатшат уло: призёр радамыш логалыт.
– Марафон – изи путешествий, шкешотан приключений. А тудыжо корныш тарваныме гыч тӱҥалеш. Лач тидыжак моткоч оҥай, таратыше. Вара – 50 километр. Ече дене куржмо годым вуйышто тӱрлыжат пєрдеш, тӱрлым шонет, а варажым кумылжат вашталтеш. Тыгай мероприятийыште шуко еҥ дене палыме лият, кутырет, мом-гынат уым пален налат, – ойла Василий. – Илышыште шкешотан ойыртем кӱлешак.
– Тыгай кужытым «Корта» ече базыштат эртараш лиеш. Тидлан ты кумдыкышто чылажат сита, йӧн уло. Мутлан, стартлан вер чапле, унагудо уло, спортзал куандарыше. Трассе неле огыл, а тидыже спортым йӧратыше-влаклан лач веле. Элыштына ече спорт вияҥеш. Ты вид дене шуко вере клуб-влак почылтыт, – маныт ечызе-шамыч.
Чынжымак, тиде базыште тыршыше-влакын пашашт моткоч ойыртемалтше. Поснак – кєн кєн пашаже огеш кой, но пеш кӱлешан. Тидын шотышто Василий Геннадьевичлан ончыкыжымат сай ечыгорны, мастарлыкым, чытымашым, еш пиалым тыланена. Тек ыштыме пашаже толшо уна, ечызе-влакым эреак куандара.
Тыге ечылан ӱшанле-влак, чылажымат шотыш налын, икте-весылан полшен, тырышмышт, пашаче улмышт дене сай результатым ончыктат, республикнам, элнам тӱнямбал кӱкшытыштє чапландарат.
Профессионал-спортсмен да нунылан полшен шогышо «эмлызылан», тыгак эреак пелен улшо тренер-влаклан моткоч кугу таум ыштена. Пырля пашаште веле лектыш сай лиеш, а ты сферыште – куандарыше результат. Тек ончыкшымат пашашт ворана, сай лектышым пуа.

Е.ЭШКИНИНА

    

 

Опубликовать в Одноклассники

Добавить комментарий