Россий президент Владимир Путин 11 майыште элыштына илыше калык деке черетан обращенийым ыштыш. Тушто тудо неле у коронавирус чер шарлыме жапыште еҥ-влаклан кузе полшаш лийме шотышто икмыняр темлымашым каласыш. Икмынярже шочшан еш-влаклан выплатым тӱлымӧ нерген ыле. Тидын нерген Шернур район Купсола ял гыч шуко шочшан ача Сергей Шабдаров тыгай шонымашан:
— Йот эл гыч мемнан деке толшо шучко у коронавирус чер — койдымо тушман манашат лиеш. Тудо ятыр ешыш «пурен лектын» да тӱрлӧ удам ыштен кертеш.
Россий президент Владимир Путинын, правительствын пунчал-влакым лукмышт – тиде пеш сай. Нуно еҥ-влакын илышыштым утарен кодаш да лийме семын саемдаш виктаралтыныт.
Иктыже — 11 майыште ыштыме обращенийыштыже шочшан еш-влаклан выплате нерген. Тудым илышыш пуртымо дене еш-влаклан моткоч кугу полыш лиеш. Йоча-шамыч кызыт мӧҥгыштӧ улыт, сандене оксамат шукырак пытараш логалеш. Ача-ава-влак, кӧмыт але марте пашам ышташ вес кундемлашке коштыныт, кызыт самоизоляцийлан кӧра каен да ешлан шийвундым конден огыт керт. Сандене южо выплатыже идалыклан ик гана веле тӱлалтеш гынат, садак кеч кочкышым, моло кӱлеш сатум налаш моткочак лач лиеш. Оксам, мутлан, изирак икшыве-шамычын уш-акылыштым вияҥдаш полшышо модышым, кугурак-шамычлан книгам налашат кучылташ лиеш.
Иктешлен каласаш гын, мый, тидын нерген пален налмеке, шуко шочшан ача семын, моткочак куанышым. Мемнан шым йочана гыч нылытынже тиде выплатым налшаш ийготан улыт. Сандене 12 майыштак кӱлеш документ-влакым Госуслуги портал гоч колтенна.
Л.КАМАЛЕТДИНОВА
