Кугу Отечественный сарыште сеҥымылан 75 ий темме вашеш Медведево район Сурок посёлкышто мемориал комплекс ышталтын.
Сарым сеҥыше салтак-шамычлан пӧлеклалтше шарныктышым чоҥымо пашан лектышыжым Марий Эл правительстве председатель Александр Евстифеев шкежак аклен. Гранит плиталаш 555 салтакын лӱмжым вераҥдыме. Нуно чыланат сар годым Сурок велне верланыше эвакуационный госпитальлаше сусырген але тулӧ чер мучашлалтмеке але пытымеке манаш лиеш коленыт.
Гирлянде ден пеледышым шарныктыш воктеке пыштыме церемоний неле чер деч аралалтме условийым шотыш налын эртаралтын.
«Сар жапыште республикыштына эвакуационный госпиталь-влак лийыныт. Чаманен каласыман, Совет Армийын чыла салтакшым арален коден кертын огынал. Тыште 555 лӱм ончыкталтын. Кажныжынак огыл кийыме вержым рашемдыме, санденак мемнан поисковикна-шамыч тыгай мемориалым ышташ йодмаш дене лектыныт. Санденак эше шапаш плитам вераҥдыме, тойымо верым верештына гын, салтак-влакын лӱмыштым ешарен ончыктена, — палемден А.Евстифеев.
Ты мемориалым ыштыме шотышто пунчалым 2019 ий мучаште тенийсе Сеҥымаш кечым палемдыме шотышто оргкомитетын заседанийыштыже лукмо ыле. Тунамак ты пашам Сеҥымаш кечын мучашлаш племдыме.
Республик вуйлатыше палемден: тыште кийыше Российын моло регионлаж военнослужащий-влакын родо-тукмыштым ӱжын, мемориалым торжественно почмашым эпидемий мучашалмеке эртарат. Шарныктышым ыштымашке кугу надырым поисковик-шамыч пыштеныт. Нунын шымлымышт почеш, сар годым республикысе эвакуационный госпитальлаште, тыгак 46 тунемме-срелковый бригадыште, Сурок станцийыште тойымо военнослужащий-влакын лӱмышт рашемын.
Александр Евстифеев поисковик, чоҥышо-шамычлан суапле пашаштлан тауштен да чылаштым Сеҥымаш кече дене саламлен. Мемориал комлекс деке сай корным ыштыме. Республикын бюджетше гыч тиде пашалан 12,5 миллион теҥгем ойырымо. А шке мемориалжым нӧлташ 1,5 миллион теҥгем кучылтмо. Эше 500 тӱжем теҥгем республикыште Шарнымаш да Чап идалыкым эртарыме партнёр фонд да 300 тӱжем теҥгем спонсор-влак ойыреныт.
Марий Эл Респубик вуйлатышын Организаций да
аналитике виктемжын уверже негызеш С.НОСОВА ямдылен
