КУЛЬТУР ДА ИСКУССТВО

Курчак театр — йомак тӱня

19 майыште Республикысе курчак театр 75 ияш лӱмгечыжлан пӧлеклалтше пайрем касым эртарыш. Ты кастене театрыш пурымеке, йомак тӱняшке логалмыла чучын. Икымше пачашым тӱрлӧ спектакльын декорацийже сӧрастарен гын, кокымшышто спектакльла гыч герой-влак порын вашлийыныт, кажне толшылан пӧлекым ыштеныт. 

Йошкар-Олаште Курчак театр 1942 ий 15 май гыч пашам ышта.  Икымше художественный вуйлатышыже Георгий Крыжицкий лийын. Тудо жапыште Георгий Константинович Маргостеатрын руш труппыжым вуйлатен.  «Петрушка у  малышей» — тыгай лӱман лийын икымше спектакль. Тидын нерген  пайрем кас тӱҥалтыштак каласен коденыт.

75 ий жапыште Курчак театр ныл зданийыште пашам ыштен, кумшӱдӧ утла тӱрлӧ спектакльым калыклан ончаш темлен, вич тукым йоча нунын дене пырля  кушкын. Кызыт театрын репертуарыштыже витле утла постановко уло. Театрын труппыштыжо — коло артист.

Театрын лӱмгече пайремжым торжественно почмаште Тӱвыра, печать да калык-влакын пашашт шотышто министрын алмаштышыже Галина Ширяева лийын. Тудо театрыште пашам ыштыше, йоча да кугурак-влакымат мастарлыкышт, у образышт дене куандарыше артист-шамычым, ветеран да театрын поро йолташыже-влакым  пайрем дене саламлаш тӱҥалмыж деч ончыч Марий Эл вуйлатышын обязанностьшым жаплан шуктышо Александр Евстифеевын саламлымашан серышыжым лудын пуэн да икмыняр артистлан да пашаеҥлан Таумутым кучыктен.

Курчак театр историйлан веле огыл поян, тудын ончыкылыкшат волгыдо. Театрын йолташыже Марий Элыштат, ӧрдыж кундемыштат шуко, кажне спектакльже Марий театр искусствын шӧртньӧ фондышкыжо пура… Курчак дене пашам ыштыше артист-влак юзо улыт. Йомак гоч нуно йоча-влаклан илышым умылаш, поро ден осалым ойыраш, сай пашалан туныктат, — возымо серышыште.

Тыгак Театр пашаеҥ-влак ушемын Марий Элысе отделенийжын председательже Константин Иванов, Марий Эл Кугыжаныш Погын председательын алмаштышыже Анатолий Иванов, Йошкар-Олан мэржын алмаштышыже Людмила Новосёлова,  театр искусствым вияҥдымашке надырым пыштымыштлан икмыняр артист ден пашаеҥлан Таумутым, Почетан грамотым, пӧлекым кучыктеныт.     

Лӱмгечым пайремлыше театр Российысе моло Курчак театр денат пеҥгыде кылым куча. Сандене ты кастене залыште Кстово, Ульяновск, Саранск, Ижевск, Набережные Челны, Чебоксар, Волгоград, Воркута олала гыч толшо  коллегыже-влакат лийыныт, поро шомакым ойленыт, паша лектышым тыланен, пӧлекым кучыктеныт.

Республикысе театрла гычат, И.Палантай лӱмеш культур да искусство колледж гычат саламлыше-влак шукын лийыныт. Театр коллектив-влак пайремлан лӱмынак посна номерым ямдыленыт. Мутлан, Г.Константинов лӱмеш академический руш драме театрын артистше-влак икмыняр кӱчык оҥай историйым модын ончыктеныт гын, М.Шкетан лӱмеш Марий кугыжаныш драме театрын самырык артистше-влак тӱрлӧ курчак лийын лектыныт да муро семын возымо саламлыме шомакыштым куштен йоҥгалтареныт. Тидым колын, Курчак театрын художественный вуйлатышыже Алексей Ямаеват кушташ лекде чытен огыл. Йоча да самырык-влаклан театр-рӱдер гыч артист-влакат мастарлыкышт дене пайрем кумылым пуртеныт.

Икманаш, Курчак театрын 75 ияш лӱмгече касыштыже саламлыше-влак моткоч шукын лийыныт. Кажныже поро шомакым ойлен, усталык пашаштышт кугу лектышым, шонымашке шуаш тыланен. Вет толшаш тургымланат Курчак театр  ыштышаш пашам шуко палемден, ятыр проектым илышыш шыҥдараш шона.

Алевтина Байкова.

(Фотом Курчак театрын архивше гыч налме.)   

Опубликовать в Одноклассники

Добавить комментарий