Элыштына «Папин день» I всероссийский онлайн-фестиваль увертаралтын.
Тудын дене келшышын, «Инстаграм», «Вконтакте», «Ютуб», «Фейсбук», «Тик-ток» соцкыллаште «Супер папа» ден «Сказка о папе» конкурс-влак эртаралтыт.
«Супер папа» конкурсышто еҥ-влаклан, пӱртӱслан, янлык-шамычлан поро пашам ыштыше ача нерген видеоматериал ден фотографий-влакым аклаш тӱҥалыт. Йодмашым да паша-влакым «https://многодетные-семьи.рф/» адрес дене соцкылыш #суперпапаРФ хештег дене вераҥдыман.
«Сказка о папе» конкурслан тыгаяк лӱман сочиненийым тиде адресышкак колтыман.
Кок конкурсышкыжат шуко шочшан еш гыч кеч-кӧ ушнен кертеш. Паша-влакым 12 июнь марте колтен шуктыман.
Конкурслаште сеҥыше-влакын лӱмыштым 20 июньышто «Папин день» I Всероссийский онлайн фестивальыште увертарат, тыгак «Многодетная Россия» проектын https://многодетные-семьи.рф/ сайтыштыже савыктат. А «Сказка о папе» конкурсышто сеҥыше-влакын сочиненийыштым эше книгашке чумырен савыктен луктыт. Тушто тыгак «Владимир Путин и российские семьи» теме дене Владимир Путинын личный архивше гыч налме фотографий-влак лийыт. Тиде книгам вараже автор-влаклан пӧлек шотеш кучыктат.
Конкурс-влак нерген тӱрыс уверым Всероссийский фестивальын Положенийыштыже лудын кертыда. Тудым фестивальын сайтыштыже вераҥдыме.
Л.КАМАЛЕТДИНОВА
