САМЫРЫК ТУКЫМ

Марий ӱдыр – чолга шӱдыр

Тачысе лаштыкын унаже уста ӱдыр Надежда Имаева. Тудо Марий Элыш Пошкырт кундем Мишкан район Шаде Шогертен ял гыч тунемаш толын. Шинчымашым  Марий кугыжаныш университетын Калыкле тӱвыра да тӱвыра кокласе коммуникаций институтыштыжо пога. Тидын деч ончыч Башкортостаныште Благовещенский педагогический колледжыште (кызыт тудо «Благовещенский шуко профилян колледж» маналтеш) тӱҥалтыш класс туныктышо специальностьым налын.

— Шочмо йылме аралалт кодшо, кумдан шарлыже манын, тый кугу пашам шуктен шогет. Иктыже — ВКонтакте социал сетьыште «Почеламут сем» тӱшкам вӱдет.

Шочмо йылмым руш йылме дене тӧр ужнем. ВКонтакте социал сетьыште рушла возымо оҥай лаштык ден тӱшка шуко улыт, а молан марлаже уке? Марий самырык-влак руш почеламутым лудаш йӧратат, а марий почеламутын улмыж нерген огыт пале. Тыге шонен, 2016 ий 12 февральыште, «Почеламут сем» тӱшкам ыштенам. Тидын деч ончыч лач шке лаштыкем веле вӱденам, садлан чылажат мылам у лийын. Икымше ийлаште пеш тыршенам. Кажне кечын еҥ-влаклан тӱшкаш ушнаш йодмашым колтенам. Эше ВКонтактыште кечыште 15-20 деч шуко икгай серышым колташ ок лий улмаш. Тыге икымше ийыште 500-700 еҥ мыйын лаштыкыштем погынен. Чылаже 5 тӱжем утла ӱжмашымат колтенам дыр, пелыже тӱшкашкем пурен огытыл. Кызыт тиде пашам ыштымым чарненам. Ноялтын. Кӧлан тӱшка келша, тудо подпискым шке ышта.

— Лукташ материалжым кушто погенат?

Тидлан шуко почеламут сборникым ончаш верештын. Кажне кечын ик книгам лудын, чонеш логалше сылнымутым ойырен налын, калыклан ончаш темленам. Тыгодым эн мотор фотосӱретым кычалынам. Тӱшкан «чурийже» сылнын коймо верч тыршенам.

— Инстаграм приложенийыштат лаштыкым марла вӱдет. 

Инстаграмыште руш-марла серыше еҥ улыт гын, марла возышыжым парня дене шотлаш лиеш. 

Тыгай уке гын, молан примерым ончыктен, шке тӱҥалаш огыл? Лаштыкемлан оҥай лӱмым шонен луктым (ot.mondo) да возаш тӱҥальым. Тидын дене мый шочмо йылме дене лӱддымын возымашым ончыктынем. Молышт ынышт лӱд, ынышт вожыл да рушла чылан умылат манын ынышт кокытелане манын шонем.

Университетыште финн йылмым тунемам, садлан инстаграмыштем ты йылме денат возаш тыршем. Финн подписчикем-влак улыт.

— Молан ot.mondo лӱмым ойырен налынат?

 — Пеш моторын шокта. Мыйым да марий йылмым от мондо.

— Тыйым интернет тӱняште Найдуш семынат палат.

Наташ, Катя, Оля-влак йырым-йыр улыт. Мый марий лӱмын сылнылыкшым ончыктынем, сандене Надям марлаҥден Найдуш манам. А кочам Эмай лийын, тудын лӱмжӧ гыч Имаев фамилий лектын.

Эмай Найдуш лӱмым мый инстаграмыште веле огыл, электрон почтыштат, Бла-Бла-Кар приложенийыштат кучылтам. Южо йолташем-влак тыглай илышыштат Найдуш маныт. Мылам келша.

— Шукерте огыл, Скайп приложений дене пайдаланен, видео урокым эртарымет нерген пален нальым…

ВКонтактыште ик пӧрьеҥ марла туныкташ йодман серышым возен ыле. Тудо мыйым «Почеламут сем» тӱшкан вӱдышыжӧ семын муын. Полышыде шым керт. Тыге Скайп приложений дене пайдаланен урокым эртараш тӱҥальым. Кызыт марий йылме грамматикым тунемына.

Мылам, ончыкылык туныктышылан, тиде кугу опыт. Шкемым дистанционно урокым вӱдымаште тергем. Кугу аудиторийыште тиде йӧным кучылташ пайдале огыл, кажным шекланен шукташ огеш лий. А вот ик еҥ дене пашам ышташ пеш сай.

— Интернет лаштык-влакет чынжымак моторын койыт. Тушто марий, финн йылме дене возгалыме постетым качественный фото дене сӧрастарет. Коклан шке сӱретлыме картине-влакат койыт.

Мыйын ачам творческий. Ондак тудо ансамбльыш коштын, куштен. Сӱретлаш йöратен. Почеркше пеш сай. Мыят изи годсек сӱретлаш йӧратем. Школышто эре плакат-влакым ыштыктат ыле. Колледжыште тунемме жапыште сӱретлаш туныктеныт, тыгак мураш, кушташ коштмо.

Фотомат ышташ пеш келша. Профессионал фотоаппаратым налмеш, Samsung смартфон дене пайдаланем. Фотошопым кучылт мошташ манын, ютубышто урокым онченам. Тыге афиша-влакым ышташ кумылем почылто. Чыла шке гыч тунемынам.

Койышемат тыгай: чыла моторын, арун, шыман гына ышташ йӧратем.

— Могай девиз дене тый илет?

«Шке пашаште эн сай лий», — тыге ачам эре ойла ыле.

Тау, Надя! Пашат лектышан лийже!

Тау!

О.МОШКИНА

Опубликовать в Одноклассники

Добавить комментарий