Кугу Отечественный сарыште сеҥымылан 75 ий темме лӱмеш Юл кундем федерал округышто кугу акций 25 апрельыште Мордовийыште тӱҥалын.
«Мемнан сеҥымаш кечына» акций Россий президентын Юл кундем федерал округысо полномочный представительжын аппаратшын темлымыж почеш эртаралтын. Участник-влак ик эн кумдан палыме «День Победы» мурым муреныт да эстафетым икте-весылан пуэныт. Ты мурым так огыл ойырымо, тудын гоч автор-влак (композитор Давид Тухманов ден поэт Владимир Харитонов) калыкын кугу подвигшым, лишыл еҥ-влакын чон корштымым, элыштына илыше да мемнан тыныс илыш верч миллион дене еҥын лӱддымын да геройлын шогымыштым ончыктат. Адакшым тиде мурын калыкыште шарлымыжлан тений — 45 ий.
«Мемнан Сеҥымаш кечына» марафон Мордовий деч вара, 26 апрельыште, Марий кундемышкына толын ыле. Чапланыше мурым «Марий кундем» калык семӱзгар оркестрын шоктымыж почеш А.И.Искандаров лӱмеш Марий кугыжаныш капеллын артистше ден ӱжмӧ солистше-влак марла да рушла йоҥгалтареныт. Мемнан республик деч вара муро эстафете Удмуртийыште, Башкортостаныште, Татарстаныште, Самара, Нижегородский, Саратов, Ульяновск, Пенза областьлаште, Пермь кундемыште… лийын.
Икманаш, 8 май марте тудо Юл кундем федерал округысо 14 регионышто йоҥгалтын. Кажне кундемыште тудым шочмо йылмышт дене муреныт.
А Сеҥымаш кечын, 9 майыште, кумдан чапланыше мурым марафоныш ушнышо чыла музыкальный коллектив мураш тӱҥалеш.
А.БАЙКОВА
