Сеҥымаш кече нерген кумдан чапланыше муро икымше гана пошкырт йылме дене йоҥген.
Таче Башкортостан Республик Россий президентын Юл кундем федерал округысо полномочный представительжын аппаратшын темлымыж почеш эртаралтше «Мемнан сеҥымаш кечына муро марафоныш ушнен.
Лӱмынак тиде акцийлан ты муро пошкырт йылмыш кусаралтын. Писатель, мер пашаеҥ да тиде мурым кусарыше Гузаль Ситдыкован ойлымыж почеш, тиде мурым тудо икымше гана 45 ий ончыч колмекыжак вик йӧратен шынден.
«Мурын мутшо ден семже чонышкемак логалыныт, — шарналта тудо. – Мылам тудым пошкырт йылмыш кусараш каласымекышт, изишак тургыжланышымат. Нине лыжга да чоныш логалше корныла гоч куанат, ойгат шижалтеш. Тиде шижмашым шочмо йылме дене чын почын пуаш кӱлын. Адакшым тактышкат логалман. Кусарымем годымат тиде мурым мый муренам. Пашам чылалан келшен, сандене моткоч куаненам. Ончыкыжым тиде мурым рушла веле огыл, шочмо йылмына денат кушкын толшо тукым мураш тӱҥалеш».
Тиде мурым Уфасе Сеҥымаш паркыште мураш калык хорын участникше, тыгак республикысе палыме еҥ-влак: Башкортостанын сулло артистше, Башкортостанысе Национальный симфонический оркестрын директоржо Артур Назиуллин, Башкортостанын калык артистше, М.Карим лӱмеш национальный молодежный театрын артистше, Башкортостан Кугыжаныш Погын депутат Рушана Бабич, «БСТ» телеканалын вӱдышыжӧ Фаягуль Давлетьярова да чапланыше музыкант Загир Зайнетдин – чумыргеныт.
Тиде марафоныш ушнаш мыйымат ӱжмыштлан моткоч куаненам, — ойла Зайнетдин. – Кумдан палыме мурым мураш – тиде пиал, чап. А шочмо пошкырт йылме дене тудым йоҥгалтарымым земляк-влаклан Сеҥымашым кондымыштлан таумут семын шотлыман. Мыйынат кок кочам сарыште лийын, но чаманен каласыман, иктыже тушеч пӧртылын огытыл. Тиде мурым, родо-тукымем ден землякем-влакын сеҥымашым налмыштлан куанен, нуным шарналтен муренам.
«День Победы» мурым икымше гана пошкырт йылме дене март мучаште – республикыштына утларак ямде улмо да мӧҥысӧ самоизоляцийыште шинчыманак манме режимым увертарыме деч ончыч йоҥгеныт. Тунамак Башкир спутниковый телевидений, Юл кундем округысо моло регионысо семын, тиде мурылан клипым войзен. Лач тушто республикын Кугу сеҥымашлан надырым пыштымыж нерген ойлалатеш. Пошкырт мланде гыч фронтыш 700 тӱжем утла еҥ каен. Нунын кокла гыч 322 тӱжем утлаже тушан вуйыштым пыштеныт але увер деч посна йомыныт. 200 тӱжем утла военослужащий орден да медаль дене палемдалтыныт. Нунын кокла гыч 295 салтак Совет Ушем Герой лӱмым налын, а 46 еҥ Чап орденын тичмаш кавалерже лийын. 2020 ийыште – сарыште 77 ий ончыч вуйжым пыштыше – 112-шо Башкирский кавалерийский дивизийын командирже генерал-майоржо Минигали Шаймуратов Российын Геройжо лӱм дене палемдалтын.
Сар жапыште Пошкырт вел 5 миллион утла тонн нефтьым да 160 миллион утла пуд киндым пуэн.
Башкортостан Республикын культур министржын икымше алмаштышыже Наталья Лапшинан ойлымыж почеш, калык акцийыште «День Победы» мурым мурымо мемнан чыланнам иктыш ушен да ончыкыжым пашам ышташ кумылым нӧлтен. «Кугу Отечественный сарыште сеҥыме — тиде элнан чыла регионжын кугу сеҥымашыже. Тыгай проектым моткоч сайлан шотлена, вет тудо совет калыкын сеҥымашыже, менан герой-влак нерген шарнаш йӧным ышта. Чыладамат шушаш Сеҥымаш кече дене!»
Йӧратыме мурым шке шочмо йылмышт дене тиде кечылаште Юл кундем федерал округысо чыла регионыштат мураш тӱҥалыт. Рушла да Юл кундемысе калык-влакын 7 йылмыж дене йоҥгышо «Сеҥымаш кече» муро ик регион гыч весыш кусна. Марафонын организаторжо-влак тыге кугу элнан икоян улмыжым ончыкташ шонен улмаш.
Ушештарена, «Мемнан сеҥымаш кечына» марафон 25 апрельыште Мордовийыште стартым налын. Тиддеч вара тудо мемнан республиклан куснен. Марий Эл гыч эстафете Удмуртийыш, а тушеч Башкортостаныш куснен.
Муро-влакым соцсетьлаште да ютюбышто #песнипобедыПФО #нашденьпобеды хэштег-влак дене муаш лиеш. Радиостанийлаштат тиде муро йоҥгалтеш.
А.БАЙКОВА
