Шушаш каныш кечылаште Марий Элыш эше 150 тӱжем маскым кондат.
Тидын нерген 23 апрельыште Марий Элыш коронавирус инфекцийым кондымым да шаркалымым шижтарыме шотышто оперативный штабын черетан заседанийыштыже правительстве председательын алмаштышыже Илга Дравниеце ойлен.
Тудын палемдымыж гыч, 22 апрельыште республикысе медицине пашаеҥ-шамычлан «Тайвек» фирме гыч шкем аралыме 3000 костюмым да кокымшо партий дене эше 2,5 тӱжем фильтроватлыше респираторым кондымо. Чыла тидым регионым вуйлатыше Александр Евстифеевын Марий Эл правительствын резерв фондшо гыч ойырымо оксаж дене налме.
«Шушаш каныш кечылаште ик гана пайдаланаш лийме 150 тӱжем маскым кондышаш улыт. Тудым республикысе аптеке сетьлашке колтена. Вес арня тӱҥалтыште шкем аралыме эше 2700 костюмым да 7380 респираторым вучена», — рашемден И.Дравниеце.
«Коронавирус чекым огеш пале. Таче пеш шуко еҥым тестироватлена, чот кугу пашам шуктена, но лачшымак тиде республикысе чын ситуацийым ужаш полша. Теҥгече селекторышто калыкым у коронавирус инфекцийлан кумдан тестироватлыше регион-влакым палемдышт. Тыгай шымлымашым 100 тӱжем еҥлан шотлымаште эртарыме чот дене Марий Эл кудымшо верыш лектын», — палемден регионым вуйлатыше.
24 апрель марте у коронавирус инфекций дене авалталтме 377 случайым официально регистрироватлыме. Ты чот гыч 112 еҥым больницыш пыштыме. Республикнан шым медицине тӧнежыштыже чылаже 248 черле, ты шотыштак 17 йоча, эмлалтеш. Пандемий пагытыште 96 пациентым, ты шотыштак коронавирусан 53 черлым, эмлыме да мӧҥгӧ колтымо. Обсерваторышто нигӧ уке.
Таче кечылан 1195 еҥым, ты шотыштак у коронавирус инфекций дене авалталтын кертше-влак дене кылым кучышо 1182 гражданым, медицине велым эскерат. Учёт гыч 3640 еҥым, ты шотыштак 53 йот гражданым, кораҥдыме.
Республикысе Гигиене да эпидемиологий рӱдерын да СПИД-рӱдерын лабораторийлаштышт коронавируслан тергаш тӱҥалме жап гыч таче кече марте 14577 шымлымашым эртарыме.
Марий Элым вуйлатышын организаций да
аналитике виктемжын уверже негызеш М.ИВАНОВА ямдылен
