СПОРТ

Шке семын ямдылалтыт

Коронавирус чер шарлыме лӱдыкшылан кєра спорт мероприятий, таҥасымаш-влак вес жапыш кусаралтыныт. Тыгак стадион, спорт площадке, объект да сооружений-влакат омсаштым петыреныт.
Тыгодым спортсмен-шамыч формым арален кодаш манын, шке семынышт тренироватлалтыт. Шукыштым теренер-влак дистанционно ямдылат.
Мутлан, Волжск олаште ече дене тренер Елена Соколова тыге умылтарыш:
– Эреак тарванылше, тренировкым ыштыше еҥлан мӧҥгыштӧ лияш путырак неле. Воспитанникна-влак дене моло семынак дистанционно пашам ыштена. Вацап, телефон гоч, видео дене. Шукышт кудывечылаште, мӧҥгыштӧ упражненийым ыштат. Кызыт ечызе-влакын шокшо тургымжак огыл, сандене спорт формым ынышт йомдаре манын, кугурак ийготанышт шке семын куржталыт, упражненийлажым мӧҥгыштӧ ыштат. Такшым 80-90 процентше тренироватлалтыт. Тренировко сита, шонем, а теве изирак, тӱҥалтыш группышто улшо-влак чыланак огыл ямдылалтыт. Нелылыкшат уло, конешне. Ме, тренер-влак, ӱдыр-рвезе-шамыч кузе ямдылалтмыштым огына уж. Сандене тєрлен огына керт. Южо ача-ава видеом колтат, тунам сайракшым молылан темлена. Теве тыгерак ямдылалтына. Таза лийза, шкендам аралыза.
Жапше годым ӱдыржӧ, ече дене спорт мастер Кристина Соколова, ты видыште сай результатым ончыктен. Кристина – Россий первенствын сеҥышыже. Кызыт тудо пошкудо Татарстаныште (Зеленодольскышто) МЧС-ыште пожарно-спасательный охраныште диспетчерлан ышта.
Кристина кастене Волжскышто чодыра воктеке куржталаш лектеш.
Кызыт тудо ешым чумырен, Солонько фамилиян. Мӧҥгыштыжӧ эше эргыж дене тренировкым эртара. Тӱҥ шотышто гимнастический упражненийлам растяжкым, приседанийым, отжиманийым ыштат, тєрштылыт.
– Ты сферыште тыршыше-влаклан уремыш лекме шотышто изиш куштылгырак. Жапым ойыраш лиеш. Ӱдыремат, тыгак Чулпан Зуева, Елена Филиппова шке семынышт тренироватлалтыт, – ойла Е.Соколова.

Е.ЭШКИНИНА

Опубликовать в Одноклассники

Добавить комментарий