25-26 майыште Марий кугыжаныш университетыште финн-угор студент-влакын «Финн-угор калык-влакын поянлыкышт» тӱнямбал форумышт нылымше гана эртен. Ты гана тушко элнан икмыняр регионжо гыч да вес эл гычат 80 наре студент ден аспирант чумыргеныт. Мероприятий Республикысе курчак реатрыште почылтын. Нуным Марий Элын тӱвыра, печать да калык-влакын пашашт шотышто министрже М.Васютин, университетын ректоржо М.Швецов, Марий тӱвыра рӱдерын директоржо Н.Пушкина, Марий курчак театрын художественный вуйлатышыже А.Ямаев саламленыт.
Икымше кечын ӱдыр-рвезе-влак Йошкар-Олам ончен коштыныт, пленар заседанийыште лийыныт, тыгак «Марий Эл» ареныште финн-угор калык модышла дене модыныт. А кастене этнодискотекыште каненыт да мурен-куштеныт.
Кокымшо кечын 9 секций пашам ыштен: «Йылмышанче, литературоведений, кусарымашын теорийже ден практикыже», «Этнографий, фольклористике, йӱла-влак», «Археологий, историй», «Декоративно-прикладной творчестве», «Музеологий ден культур туризм», «Финн-угор калык-влакын профессионал художественный тӱвырашт», «Образованийыште – тачысе технологий. Увер технологий», «Финн-угор университетлаште студент самоуправлений», «Самырык финн-угор-шамычын инициативышт». Тыгак ты кечын нуным тӱрлӧ мастер-класс, концерт программе вучен.
А кызыт мутым самырык шымлызе-влаклан пуэна:
Михаил Финамов, Удмурт кугыжаныш университет: «Мый журналистлан тунемам. Марий Элыш икымше гана толынам, Йошкар-Ола да тыште илыше калык мылам моткоч келшен. Тендан чон порылыкда мемнам ырыкта. Марий калык кочкышымат тамлен шуктенам. Пеш тамле. Тыште историй дене кылдалтше шымлымаш пашам лудаш тӱҥалам. Тудо Венгрийыште 1956 ийыште лийше событий дене кылдалтын».
Ангелина Аршинова, Мордва кугыжаныш университет: «Йошкар-Ола мылам келшен, поснак эҥер сер. А форум жапыште йылмышанче секцийыште глобальный суффиксым шымлыме пашам дене палдарем. Ты мероприятийыште шукырак йолташым муаш, вес калыкын тӱвыраже да йулаж дене лишкырак палыме лияш шонем».
Л.ШАБДАРОВА.
М.Скобелевын фотожо.
Снимкыште: Мордовий Республикын делегацийже.
