Марий Элын бокс дене спорт федерацийже Россий бокс федерацийын акцийыштыже участвоватла. Нуно коронавирус пандемий жапыште ынде кум арня лиеш, элнан кажне регионыштыжо Россий бокс федерацийын спортын ветеранже, чыла спортсменлан, тренер, судья-шамычлан, тыгак Кугу Отечественный сарын ветеранжылан, пенсионер-влаклан да шуко икшыван ешлан полшымо шотышто шокшо линий пашам ышта. Тушко мотокоч шуко еҥ йыҥгыртен. Лӱмынак оперативный штабым ыштыме.
Мер организацийын вуйлатышыже А.Исматулаевын палемдымыж почеш, Марий Элыштат верысе бокс федераций еҥ-влаклан кажне кечын полышым пуа.
– Мутлан, Кугече пайрем деч вара 13 вере мийыме. Такшым ик кечын шым вере миен шуыт. Тӱҥ шотышто спортын, сарын ветеранже-влак йыҥгыртат. Кызыт медицине маскым, антисептикым пуэдена. Икымше арня тӱҥалтыште боксын ветеранже-шамычлан кочкыш наборым (шӱрашым, ложашым, нӧшмӱйым) намиенна. Автомашиным шкеак виктарем. Южо вере коллегына-влакым наҥгаяш йодына. Кушто федерацийын бокс отделенийже уло, тушто куштылгырак. Мутлан, Шернурышто, Параньгаште, – ойла Алиджон Шакурлович.
Тудын мутшо почеш, Россий бокс федерацийын ойырымо маскыже, антисептик пытен. Республикысе федерацийын оксаж дене налыт, вет моло регионышто тиде йодыш эшеат пўсє. Мутлан, Татарстан ден Пошкырт кундемыште. Корнылаште тӱткыш кугемын. Сандене нунымат ГИБДД-ын сотрудникше-влак чӱчкыдын шогалтат. Лишыл кечылаште волонтёр рӱдерыште бейджикым пуышаш улыт.
Кӧлан волонтёр полыш кӱлеш але иктаж еҥын ты поро пашаш ушнымыжо шуэш, тыгай номеран телефон дене йыҥгыртен кертыда: 8 (800) 222-55-25.
Федерал шокшо линийын телефон номерже тыгай: 8-800-200-34-11.
Е.ЭШКИНИНА
