22 апрельыште Россий правительстве пеленысе Коронавирусын шарлымыж ваштареш кучедалме шотышто координационный советын черетан заседанийже эртен. Тушто РФ субъектлам вуйлатыше-влакат участвоватленыт. Элнан промышленность да торговльо министрже Денис Мантуров регион-влакын шке аралыме средствым кузерак налмышт дене палдарен.
«Нелылыкым шке семын чактарен кертме нерген нимогай данный уке гынат, южо регион шкем аралыме средствылан заказым огеш ыште. Мутлан, Амур область – ноль закупко, Алтай Республик – ноль закупко, Тыва – ноль закупко. Алтай кундем икымше гана кок тӱжем костюмлан заказым ыштен. Тушто тиде проблемым ала шке семын решатлат? Но тидын нерген ны правительствыште, ны информационный рӱдерыште нимогай увер уке. Пожар талышна, да шкем аралыме средстве шуко да тачак кӱлеш лиеш гын, тидым ышташ просто огеш лий», — увертарен Мантуров.
Минпромторг министрын палемдымыж почеш, шкем аралыме средствым шеледыме шотышто утларак чолга кылым Москва, Москва область, Санкт-Петербург, Севастополь, Приморский край, Краснодарский край, Коми Республик, Марий Эл, Камчатка, Тула, Ставрополье, Ленинград, Псков, Липецк, Брянск областьла да эше моло регион дене ыштыме.
Мут толмашеш, эртыше кечылаште Марий Элыш Россий Минпромторг велым шкем аралыме кум тӱжем костюмым кондымо. Закупкын акше 8 млн. теҥгеш шуын.
М.ИВАНОВА
