УВЕР ЙОГЫН

Аза таза шочын

Йошкар-Оласе Перинатальный рӱдерыште тылеч ончыч коронавирус инфекций деч эмлалтше ӱдырамаш азам ыштен.
Марий Элнан рӱдолаштыже илыше мӱшкыран ӱдырамашым «пневмоний» диагноз дене Йошкар-Оласе больницын инфекционный отделенийышкыже пыштеныт. Тестированийын результатше тудын у коронавирус инфекций дене авалталтмыжым пеҥгыдемден.
– Мемнан врачна-влак тиде пациентым эмлыме тактике нерген Кулаков лӱмеш Акушерстве, гинекологий да перинатологий национальный медицине шымлыме рӱдерын специалистше-шамыч дене иквереш кутыреныт, — каласкала Марий Эл Минздравын тӱҥ акушер-гинекологшо Виктор Дробышев. – Тылеч вара ӱдырамашым Медведево районысо рӱдӧ больницын коронавирусан черле-влаклан хирургический да акушерско-гинекологический профилян медицине полышым пуымо корпусышкыжо кусарыме. Тушто тудын тазалыкшым врач-инфекционист ден акушер-гинеколог эскереныт. Эмлыме йӧн келшен толын, черетан тестирований черын чакнымыжым пеҥгыдемден. Азам ышташ тарванымыж годым ӱдырамашым Перинатальный рӱдерын изоляторышкыжо кондымо. Ӱдыр аза шке жапыштыже шочын. Тудын тазалыкшым тергыме, организмыштыже инфекцийым мумо огыл.
Кызыт ава ден аза мӧҥгыштышт улыт. Нунын тазалыкыштым участкысе врач ден педиатр эскерат.

М.ИВАНОВА

Опубликовать в Одноклассники

Добавить комментарий