Юрино поселко воктене, пассажир ден турист-влакым шупшкыштышо Юл эҥерыште коштшо судно-влак шогалын кертышт манын, условийым ышташ палемдыме.
Юрино-Козьмодемьянск-Чебоксар, Юрино — Нижний Новгород маршрут влакым почаш гын, нине районлаш инвестицийым кондаш йӧн лектеш. Тыгай шонымашым Калык форонтын Марий Эл Республикысе региональный штабшын сопредседательже Руслан Гизатуллин луктын ойлен. Эртыше кечылаште тудо Юрино районышто лийын. Эше 2011 ийыштак Марий Эл Правительствын кӱштымыж почеш Юл эҥерын руслыжын пундашыжым шымлыме паша эртаралтын. Варажым эҥерын пундашыжым тудо верыште келгемдаш, дебаркадерым налаш да вераҥдаш палемдыме улмаш. Но проектно-сметный документацийым ыштыме деч вара пашаже вораҥын огыл.
Руслан Гизатуллинын ойлымыжо почеш, ты пашам тӱҥалаш гын, верысе калыкланат, толшо уна-шамычланат тушто сайын канаш йӧн почылтеш. Тидыже туризм пашам ворандарен колтымо дене республикын бюджетшымат пойдараш полшышаш.
С.Носова.
