ЛӰМГЕЧЕ

Саламлена!

Пошкырт кундем Мишкан районын чолга эргыже, Марий да Финн-угор тӱнян уста мер пашаеҥже, «Марий Эл» рӱдӧ марий газетын мунло директоржо
Александр Саликович АБДУЛОВЫМ
60 ияш лӱмгечыж дене!
Александр Саликович Марий Элысе печать пашаште 30 ий утла тырша. Да ты пашам тудо рӱдӧ марий газет гычак тӱҥалын – 1985-1987 ийлаште «Марий коммуна» газетыште кусарышылан да корреспондентлан ыштен. Чолгалыкшым ужын, тудым ВЛКСМ обкомыш лектор группым вуйлатышылан налыныт. Тушто вич ий ыштыме жапыште мер пашалан шӱмаҥын, эсогыл Финн-угор калык-влакын самырык тукымыштын ассоциацийыштым ыштымашке чулымын ушнен – 1990-1992 ийлаште МАФУН-ын икымше президентше лийын. Шкенан республикыштат самырык-влакын «У вий» усталык ушемыштым чумырен да тудын гочак самырык-влаклан посна марий газетым угыч лукташ тӱҥалаш таратен сеҥен, шкежак икымше редакторжо лийын. Тудын вуйлатымыж денак озанлык расчёт негызеш «Саман» сылнымут альманахым лукмо.
Вара Александр Абдулов «Марий Эл» кугыжаныш телерадиовещаний компаний отделын редакторжылан ыштен. Тушеч адак кугыжаныш пашаш налыныт – Марий Эл кугыжаныш секретарьын наций-влак кокласе кыл шотышто советникше, Марий Эл правительстве вуйлатыше алмаштышын службыжын консультантше, Марий Эл президентын советникше лийын.
А 1997 ийыште угыч рӱдӧ марий газетыш тӱҥ редакторын алмаштышыже семын пӧртылын. 1999 ий гыч «Марий Эл» газет» ГУП-ын, вара ООО-н тӱҥ редакторжо да директоржо пашам шукта. 2002 ий гыч тудын тыршымыж денак эше «Сурт-пече» газетым лукташ тӱҥалме, шуко лудшым савырыме. 2004 ий гыч 2014 ий марте тыгак Финн-угор журналист-влакын Россий ассоциацийыштын президентше семын кугу мер пашам шуктен шоген да пале кышам коден.
Тудын пашажым кугыжанышна кӱкшын аклен: 2000 ийыште «Марий Эл Республикын сулло журналистше», 2011 ийыште «Россий Федераций культурын сулло пашаеҥже» почётан лӱмлам налын, 2020 ийыште «За заслуги перед Марий Эл» орденын медальже дене наградитлалтын.
Рӱдӧ марий газетнам Александр Абдулов ынде коло ий утла вуйлата. Ончычсо вуйлатыше-влак деч эн кужун тыршымыже тудын чылажымат шонен да вискален ыштымыж нерген ойла. Наций-влак кокласе кыл ден политике йодышым ончыктымаштат тудо тидым тӱҥлан шотла. Да тидын денак «Марий Эл» газет лӱмжым кӱшнӧ куча, лудшын йӧратыме да ӱшанле йолташыже лийын кодеш.
Пагалыме вуйлатышына Александр Саликович Абдуловлан ончыкыжымат тыгаяк мунло, пеҥгыдын йодшо да тунамак поро лийын кодаш тыланена.
«Марий Эл» газетын ешыже да йолташыже-влак.

 

 

Опубликовать в Одноклассники

Добавить комментарий