Марий Элыште алкоголян продукцийым ужалыме сферыште правам пудыртымо шотышто контрольым эшеат вияҥдат.
9 апрельыште «Марий Элыште алкоголян продукцийым розницыш ужалыме шотышто ешартыш чарымашым ыштыме нерген» законыш вашталтышым пуртымо. Тудын дене келшышын, утларак ямде улмо режим жапыште алкоголян продукцийым 18 гыч 14 шагат марте ужалаш чаралтеш.
У коронавирус инфекцийым кондымым да республикыштына шарымым шижтарыме шотышто оперативный штабын заседанийыштыже Марий Элым вуйлатыше А.Евстифеев регионысо элкӧргӧ паша министр Сергей Волчковлан спиртан продукцийым ужалыме сферыште правам пудыртымо шотышто контрольым организоватлаш кӱлмӧ нерген каласен.
«Тиде йодышын палынак пӱсын шогымыжым чыланат сайын умылена. «Вашкеполыш» станцийыш йыҥгыртыше-влак шукемыныт, аракам утыждене йӱмылан кӧра ик еҥ эсогыл колен. Чаманен палемдем, южышт пашам ыштыдыме жапым кугу пайремлан шотлат. Врач-шамыч коронавирусым «шодо чума» маныт, а мыланна «чума» жапыште пайрем огеш кӱл. Тендан пашаеҥда-влак мероприятий-шамычым шагалемдыме жапыште сайын пашам ыштат: калыкым шогалтат, мутланат. Тиде чыла чын. Алкоголян продукцийым ужалыме сферыште осалланымым кӱлынак эскераш йодам», – манын регионым вуйлатыше.
Марий Элым вуйлатышын организаций да
аналитике виктемжын уверже негызеш М.ИВАНОВА ямдылен
