Марий Элын Тазалыкым аралыме министерствыжын увертарымыж почеш, таче, 10 апрельыште, регионыштына у коронавирус инфекций дене черланыме эше 22 случайым регистрироватлыме. Тыге, республикыштына COVID-2019 дене авалталтше-влакын чотышт 63 еҥ марте кугемын.
Йошкар-Оласе больницын инфекционный отделенийже гыч теҥгече у коронавирус инфекций деч эмлалтше эше ик пациентым мӧҥгыжӧ колтеныт.
Тачысе эрлан больницыште 64 еҥ эмлалтын. Ты чот гыч 22 пациент неле состоянийыште, 41 еҥын состоянийже «нелылыкын кокла йыжыҥже» семын аклалтеш, иктын – «куштылго йыжыҥ» семын. 32 еҥлан кислород кӱлеш, коктын шодым искусственно вентилироватлыме йӧн дене шӱлат.
Республиканский йоча клинический больницыште молгунамсе семынак ик йоча кия. Тудо шкенжым сайын шижеш.
Звенигово районысо рӱдӧ больницыште коронавирус инфекциян ик пациент эмлалтеш. Тудат шкенжым сайын шижеш.
Медведево районысо рӱдӧ больницыште COVID-2019 дене авалталтше пациент-влаклан хирургический да акушерско-гинекологический профилян медицине полышым пуымо отделенийыште ик ӱдырамаш кия.
М.ИВАНОВА
