МАРИЙ ЙӰЛА

Марий йӱлам – онлайн сессий гоч

3-12 апрельыште Йошкар-Олаште Агробизнес кадрым уэш ямдылыше марий институтышто «Калык да религий кокласе кыл шотышто специалист» направлений дене сессийышт онлайн йӧн (Zoom приложений) дене эрта.

Тудым «Ош кече» фондым вуйлатыше Виталий Головин оганизоватен. Онлайн сессйыш ты курсым ӱмаште тунем пытарыше да кызыт тунемше-влак гоч ушненыт. Лекцийым колыштмеке, кажныже шке шонымашым ойла, йодышлан вашешта.

Тыге латик кече жапыште нуно марий йӱлам шуктымо ойыртем, кумалтыш мут, религиозный организацийыште PR да менеджмент, кугыжаныш ден конфессий-влак кокла кылыште стратегический планированийын негызше, религийын философийже да концептуальность теме-влакым шымлаш тӱҥалыт. Тылеч посна марий-калыкын шошо пагытысе йӱла пайремышт нерген келгынрак пален налыт. Теве, мутлан, шуматкечын Советский район гыч онаеҥ Герман Милютинын пуымо материалже негызеш Вӱд Ава нерген утларак пален налыныт гын, рушарнян марий Кугече нерген оҥай лекций лийын. Тудыжым краевед И.Степанова шке шымлымашыже негызеш ямдылен. Сессий жапыште тыгак «Еш кумалтыш» радамымат ончаш тӱҥалыт, культурологий доктор Галина Шкалина, историй науко кандидат Сергей Свечников, тыгак районла гыч онаеҥ-шамыч ушнат.

Ты направлений кок ий ончыч Йошкар-Оласе «Марий кумалтыш» общинын темлымыж почеш почылтын. Тудо Федеральный кугыжаныш образовательный стандарт (ФГОС) дене келшышын ышталтын. Туныктымо программыже курс вияҥме семын уэмдалтеш. Шушаш 2020-2021 тунемме идалыкыштат ты курсыш кумылан-влакым кызытак ушнаш темлат. Тидлан +7 906 334 24 80 (Ираида Александровна), +7 980 547 90 77 (Виталий Федорович) телефон номер дене йыҥгыртен кертыда.

С.ПЕХМЕТОВА

Опубликовать в Одноклассники

Добавить комментарий