Марий Эл вуйлатыше А.Евстифеевын кӱштымыж почеш Йошкар-Олаште коронавирус чер шарлен кертме лӱдыкшым кораҥдаш манын, тӱрлӧ вере санитарный обработкым эртараш тӱҥалыныт.
Эн ончыч остановкым, поликлиникыш, эмлымерыш, аптекыш, йочасадыш, кочкышым ужалыме кевытыш пурымо верым дезинфекцироватлат.
Таче «Ремзавод» микрорайонышто верланыше Йошкар-Оласе эмлымвер гыч тӱҥалын «медгородок» манме кумдыкым тӱрыс дезинфекцироватленыт. Варажым моло микрорайоныш куснат.
Ола уремым дезифекцироватлаш Йошкар-Оласе ракетный дивизийын военный техникыжым ушымо. Авторазливочный станциян 2700 литр пурымо йоҥгытан военный технике вич метр лопкытым дезинфицироватлен кертеш. Тыгодым 1 кв метр кумдыклан 0,5 л растворым кучылтеш.
Таче ты сомылым шукташ кум единице технике лектын, эрла куд тыгай технике обрабатыватлаш тӱналеш.
Олам мемнан денак ыштен лукмо «Ника-Экстра М Профи» раствор дене дезинфицироватлат. Ты раствор тӱрлӧ микроб ден бактерий, гриппын вирусшо да пӱсӧ респираторный вирусын инфекцийжым таратен кертше возбудительым сеҥен кертше виян.
– Таче деч вара оласе коммунал службын пашаеҥже-влак кажне кечын тӱшкан пайдаланыме кумдыкым эрыкташ тӱҥалыт. Ты сомылым шуктышо оласе коммунал службын пашаеҥже-влаклан дезинфицироватлыше средстве да спецвургемым ситышын пуат. Общественный транспортым, кочкмо верым эреак сайын эрыктен шогат. Тыгай пашам у коронавирус инфекций дене черланыше-влак шагалемаш тӱҥалме марте шукташ тӱҥалыт, – палемден Марий Эл вуйлатыше А.Евстифеев.
Тыгак регион вуйлатыше виктарыше компаний-шамычлан илыме пӧрт-шамычымат санитар нормо дене келшышын эрыкташ кӱштен. Таче кече гыч шуко пачашан пӧртым обслуживатлыше виктарыше компаний-влак подъездым, тошкалтышысе кидкучемым, пурен-лекме омса кылым, лифт ден домофон кнопко панельым антисептический раствор дене ӱштшаш улыт.
Марий Эл Республикым вуйлатышын организаций да аналитике
виктемжын уверже негызеш Р.ЧЕПАКОВА ямдылен
Д. Речкинын фотожо
