Марий Эл Тазалыкым аралыме министерствын увертарымыж почеш, 3 апрельлан Йошкар-Оласе больницын инфекционный отделенийыштыже 17 пациент эмлалтын.
Ныл еҥын у коронавирус инфекций дене черланымыжым пеҥгыдемдыме. Кум пациентын тазалыкше «нелылыкын куштылго йыжыҥже» семын аклалтеш, иктын – «нелылыкын кокла йыжыҥже» семын.
Лу еҥ – «нелылыкын кокла йыжыҥыштыже», кумыт – «нелылыкын куштылго йыжыҥыштыже». Респираторный полыш нигӧлан огеш кӱл.
Волжск оласе рӱдӧ больницын первичный вӱргорно отделенийыштыже медицине полышым пуымо годым ик пациентын – Звенигово районышто илыше пӧръеҥын – коронавирус дене черланен кертмыж шотышто кокытеланымаш лектын. Ончылгоч ыштыме тест «положительный» результатым пуэн. Пациентым Звенигово районысо рӱдӧ больницыш наҥгайыме да коронавирус дене черланыше-влаклан ямдылыме инфекционный отделенийыш эмлалташ пыштыме. Анализшым эше ик гана тергаш колтымо. А Волжск оласе рӱдӧ больницын вӱргорно отделенийыштыже, санитарный нормо дене келшышын, дезинфекцийым ыштыме.
Тазалыкым аралыме министр Марина Панькова Йошкар-Оласе больницын инфекционный отделенийыштыже пашам ыштыше коллектив дене кече еда вашлиеш, койко-влакым ямдылыме пашам терга, лекше йодышым решатлаш полша.
– Рӱдоласе больницын медицине пашаеҥже-влак проста огыл жапыште ӱмбакышт вочшо чыла ответственностьым умылат да шке обязанностьыштым кӱлын шуктат, – манеш Марина Викторовна. – Пациент-шамыч кӱлешан полышым налыт, нунын коклаште неле черле тачылан уке. COVID-2019 инфекций дене кылдалтше ситуаций республикым вуйлатыше Александр Александрович Евстифеев дене эреак лончылалтеш. Тудо коронавирус инфекций дене кучедалме икымше радамыште шогышо медицине пашаеҥ-влакын тыршымыштым кӱкшын акла да чыла проблемым, ситуацийлан вияҥаш йӧным пуыде, пеш писын решатла.
М.ИВАНОВ
