Марий Эл Тазалыкым аралыме министерствын 2020 ий 2 апрельыште лукмо 745-ше №-ан кӱштымашыж дене келшышын, 3 апрель гыч регионысо поликлиникылаште COVID-2019 коронавирус инфекцийлан логараҥ да неррож гыч мазокым налмым чарненыт.
Айдемылан йӧсӧ лийын, ОРВИ дене черланымыж гай чучеш, тыгак капкыл температуржо кӱзен, логарже коршта, кокыра гын, тудо участкысе врачлан йыҥгыртышаш. Доктор черлын мӧҥгыжӧ толеш да коронавируслан тестым ышта. Тидым «вашкеполыш» службын пашаеҥже-влакат ыштен кертыт.
2 апрельыште РФ президент В.Путинын россиян-влак деке обращений дене лекмыж деч вара посна улмо режимым пеҥгыдемдыме да коронавирус инфекцийын шарлымыж ваштареш шогалме шот дене поликлиникылаште COVID-2019 вирус дене черланыше гай койшо пациент-шамычым приниматлымым чарныме.
М.ИВАНОВА
