ТАЗАЛЫК

Тый – мылам, мый – тылат

Регионыштына медицине маскын ситыдымыжым шотыш налын, «Йолочка» предприятий тудым Марий Элын Волонтёр рӱдержын еҥже-влаклан лӱмынак ургаш тӱҥалын.

– Кызыт республикыштына шкем аралыме маскым муаш моткоч неле. Тидым да шкенан йӧннам шотыш налын, неле жапыште поро пашам шуктышо волонтёр-влаклан полшаш кутырен келшышна, – манеш предприятийын директоржо Дмитрий Фурзиков.

Мутлан, 1 апрельыште Коронавирусын пандемийже дене кылдалтше утларак ямде улмо режим жапыште регионысо калыклан полышым пуышо волонтёр рӱдерыш «Йолочка» предприятий 30 маскым конден.

– Лишыл кечылаште утларакат урген кертына манын шонем. Тымарте тыгай пашам шуктен огынал. Просто поро пашам шуктышо волонтёр-шамычлан полшаш кумылна лектын, – палемда вуйлатыше.

Волонтёр-шамычлан маске эреак кӱлеш, вет нуно мӧҥгыштӧ шинчыше илалше еҥ ден инвалид-влак деке кочкыш ден кӱлешан моло сатум, медикаментым налын намият, торым луктын кудалтат, почтым тергат, моло йодмашыштымат шуктат. Тидым, мутат уке, маске да резинке перчатке деч посна ышташ огеш лий, сандене амалкалчын полышыжо нунылан моткоч шергакан.

Волонтёр рӱдерын «шокшо линий» телефонжо: 8 (8362) 63-00-39.

Шуко ола ден районышто верысе «шокшо линий-влак» пашам ыштат:

Волжск олаште да Волжский районышто: 8 (83631) 6-35-75;

Звенигово олаште да районышто: 8 (83645) 7-08-54;

Кужэҥер районышто: 8 (83637) 9-13-37 але 8 (83637) 9-44-34.

ОНФ-ын «шокшо линийже»: 8-800-200-34-11.

М.ИВАНОВА

Опубликовать в Одноклассники

Добавить комментарий