Марий Эл Финанс министерствын увертарымыж гыч, 2020 ий 2 апрельыште регионын Социальный вияҥмаш министерствыжын йодмашыж почеш, республикын бюджетше гыч 1941-1945 ийласе Кугу Отечественный сарыште сеҥымылан 75 ий темме шот дене Россий Федерацийын южо гражданжылан единовременный выплатым ышташлан оксам тичмашын ойырымо.
Палемдыме выплатым нине еҥ налыт:
а) Кугу Отечественный сарын инвалидше; 1995 ий 12 январьыште лукмо «Ветеран-влак нерген» ФЗ-№5 федеральный законын 2-шо статьяжын 1-ше пунктшын 1-2-шо пунктлаже йымалне ончыктымо Кугу Отечественный сарын ветеранже; «Жителю блокадного Ленинграда» знак дене палемдалтше; Кокымшо тӱнямбал сар жапыште фашист да тудын союзникше-влакын ыштыме концлагерьлан, геттолан да виеш кучымо моло верлан тунамсе ийготыш шудымо узникше-шамычлан; Финн, Кугу Отечественный, Япон сарлаште вуйым пыштыше военнослужащий-шамычын тулык ватыштлан (марийыштлан); Кугу Отечественный сарын колышо инвалидше ден участникше-влакын тулык ватыштлан (марийыштлан) – 5000 теҥге дене;
б) 1941 ий 22 июнь — 1945 ий 9 май пагытыште тылыште куд тылзе деч шагал огыл пашам ыштыше (тышке СССР-ын оккупироватлыме кумдыклаштыже пашам ыштыме жап ок пуро), Кугу Отечественный сар жапыште шкем чаманыде пашам ыштымылан СССР-ын орденже да медальже дене палемдалтше-влаклан – 3000 теҥге дене.
1941-1945 ийласе Кугу Отечественный сарыште сеҥымылан 75 ий темме шот дене ойырымо единовременный выплатым республикыштына 5 тӱжем утла еҥ налеш.
Палемдыме окса граждан-влакын кредит организацийласе счётлашкышт 2-3 паша кеч жапыште пура.
М.ИВАНОВА
