Марий Элыште физический культурым да тӱшка спортым вияҥдаш республик вуйлатышын грантшым налше-влак пале лийыныт.
Грантым налаш тений чылаже 46 йодмаш пурен.
Положений почеш, грантым республикын бюджетше гыч ойырат.
«Тӱшка спорт» направлений дене сеҥыше-влаклан 50 тӱжем теҥге гыч 18 грант ойыралтеш. Тудым налше-влак коклаш паралимпийский резерван спортивно-адаптивный школ, лапта, бокс, фитнес-аэробике дене федераций-влак, Шернур районысо йоча усталык пӧрт, «Динамо Йошкар-Ола» футбол клуб, инвалид-влакын культурно-спортивный реабилитационный рӱдерышт, иймаш дене олимпийский резерван спорт школ логалыныт.
«Кӱшыл достижениян спорт» направлений дене грантым налше олимпийский резерван «Виктория», иймаш, спорт гимнастике, куштылго атлетике дене спорт школ-влаклан, паралимпийский резерван спортивно-адаптивный школлан, фитнес-аэробике, эстетический гимнастике, ӱштӧ дене кучедалмаш, бокс дене федераций-влаклан 100 тӱжем теҥге окса ойыралтеш.
«Тӱшка спорт» направлений дене физкультур да спорт мероприятийым эртараш кӱлеш, а «Кӱшыл достижениян спортышто» республикын сборныйжын членже лийшаш улыт.
Сеҥен налме грант турнирлаште вийым тергаш, материально-технический базым уэмдаш, сборым, таҥасымашым эртараш, физкультур да спортым пропагандироватлаш кайышаш.
Е.ЭШКИНИНА