Марий Элыште коронавирус дене черланыме икымше кок случайым регистрироватлыме.
29 мартыште Йошкар-Олаште врач-влак коронавирус дене черланыме икымше кок случайым пеҥгыдемденыт. Вирус рӱдолаште илыше 38 ияш ӱдырамашым авалтен. Кызыт тудын кушто черланен кертмыжым рашемдат. Вес 26 ияш ӱдырамаш Москвасе ик аэропортышто пашам ыштен, Марий Элыш чуваш поезд дене толын. Кок пациентымат больницыш пыштыме.
Марий Элым вуйлатыше Александр Евстифеев коронавирус дене черланыше ӱдырамаш-влакын тазалыкышт нерген тыге каласкален: «Республикыште эпидемиологический ситуаций – контрольышто. Специалист-шамыч мыланем увертареныт: кок пациентынат тазалыкышт сай. Ӱдырамаш-влак инфекционный боксышто эмлымверыш вочмышт деч вара кок арня лийыт».
Кызыт черле-влак дене пырля лийше еҥ-влакым рашемдат. Нуным медицине велым эскераш тӱҥалыт.
Республикыште кӱлешан чыла вий уло, ӱшандарен А.Евстифеев. Марий Элым вуйлатыше тыгак эртыше каныш кечылаште мӧҥгыштӧ лийше да ситуацийым умылышо чыла еҥлан тауштен.
«Вирусын регионыштына мынярак писын шарлымыже кажнына дене кылдалтын. Кызытеш шуко еҥ черын осаллыкшым огеш умыло да уремыште молгунамсе семынак коштеш. Тӱнямбал практике тиде койышын лӱдыкшӧ улмыжым ончыкта. Тиде жапыште эн тӱҥжӧ – мӧҥгыштӧ кодаш да вирусын шарлымыжым эркыштараш», – палемден Марий Элым вуйлатыше.
Кызыт республикыштына 1117 еҥым медицине велым эскерат. Учёт гыч 134 еҥым кораҥдыме, нуно шке жапыштыже йот элла гыч толыныт.
Ушештарена, тиде жап марте Марий Эл Юл кундем федеральный округышто у коронавирус инфекций дене черланымым регистрироватлыдыме улыжат ик регион лийын.
Марий Элым вуйлатышын организаций да аналитике виктемжын уверже негызеш М.ИВАНОВА ямдылен
