31 мартыште Россий Федерацийын У коронавирус инфекций шарлыме ваштареш шогалме шотышто кугыжаныш советшын пашаче группыжын черетан заседанийже лийын. Тудым Сергей Собянин видеокыл йӧн дене эртарен. Заседанийыште Марий Элым вуйлатыше Александр Евстифеев участвоватлен.
Марий Элыште эпидемиологический ситуаций – контрольышто. Аптекылаште да медицине организацийлаште кӱлешан препарат-влакын улмыштым контрольышто кучымо шотышто мониторинг умбакыже эртаралтеш. 30 мартыште регионыш ик гана пайдаланаш лийме 82 тӱжем маскым кондымо. Лишыл жапыште тудын кокымшо патрийжым да аралалтме моло изделийым – костюмым, халатым, перчаткым – медицине пашаеҥ-шамычлан кондышаш улыт.
30 мартлан Марий Элыште Гигиене да эпидемиологий рӱдерын да СПИД-рӱдерын лабораторийлаштышт 2333 еҥ деч налме 2378 материалым шымлыме. Тиде жапланак республикыштына коронавирус дене черланыме 2 случайым регистрирооватлыме. Анализым Роспотребнадзорын «Чума ваштареш рӱдер» ФКУЗ-шын референс-рӱдерыштыже пеҥгыдемдыме.
Вирус Москваште илыше 26 ияш ӱдырамашым авалтен. Тиде черлын 33 еҥ дене кылже лийын, чылаштлан мӧҥгысӧ карантин нерген пунчалым лукмо. Тыгак медицине организаций-влаклан нуным эскереш кӱштымӧ. Черлын лишыл еҥже-шамычым тергыме, нунын анализышт сай.
Коронавирус дене черланыме кокымшо случай рӱдолаште илыше 38 ияш ӱдырамаш дене кылдалтын. Тудо Йошкар-Ола гыч нигушкат лектын огыл. Кызыт пациентын кузе черланен кертмыжым тергат. Тиде случай шотышто ӱдырамаш дене пырля лийше 141 еҥым рашемдыме.
31 мартлан 1125 еҥым, ты шотыштак 1073 россияниным да 52 йот гражданым, медицине велым эскерат. Нунын кокла гыч 248 еҥже у коронаврирус инфекциян черле дене кылдалтын.
Россий МВД Марий Элысе МВД-лан элыш толшо граждан-влакын спискыштым кече еда колта. Тиде списке адрес-справке да госавтоинспекций учётлаште улшо увер дене тергалтеш. Гражданинын республик гыч РФ вес субъектышкыже кайымыж шотышто увер мийышаш верышкыже пуалтеш. 29 мартлан тыгай уверым 150 граждан шотышто колтымо.
Карантиным кӱлын шуктыдымылан 5 еҥлан административный протоколым возымо.
Марий Элым вуйлатышын организаций да
аналитике виктемжын уверже негызеш М.ИВАНОВА ямдылен
