Оршанке районысо Кугунур тӱвыра пӧртым уэмден олмыктымо паша тений кеҥежым, июльышто, мучашлалтшаш, увертара республикысе Тӱвыра, савыктыш да калык паша шотышто министерствын пресс-службыжо.
Тидлан федерал, республик да муниципал бюждет гыч 5,7 миллион теҥге ойыралтын. Зданий «Тӱвыра» национальный проектшын регионысо «Тӱвыра алан» проектше полшымо дене у тӱсым налеш.
Оралтым уэмден олмыкташ тений февральыштак тӱҥалме. Чоҥышо-влак леведышыште шиферым кораҥденыт, тудым профнастил дене петыреныт, южо вере кӱвырым шареныт. Тиддеч посна пластик окнам шындат.
Тиде зданий чоҥалмеке, олмыктымо паша 47 ий ышталтын огыл. У тӱсым налше культур пӧртыштӧ «Шонанпыл» ден «Какшан сем» фольклор ансамбль-влак да молат пашам ышташ тӱҥалыт.
А.Байкова
Фотом Культур министерствын сайтше гыч налме