Корно туткар
Арня тӱҥалтыште кум кече жапыште республикысе корнылаште 2 ДТП лийын. Тушто эмганыше-влакат улыт. Госавтоинспекций пашаеҥ-влак корно правилым 855 утла гана пудыртымым рашемденыт, йӱшӧ 12 водительым кученыт.
Тӱкен
24 мартыште 7 эр гутлаште Медведево районысо Юбилейный посёлкышто Daewoo машинам виктарымыж годым 23 ияш водитель 59 ияш ӱдырамашым тӱкен. Тудо корно тӱр дене ошкылеш улмаш. Туткарыште ӱдырамаш сусырген.
25 мартыште 16 шагат гутлаште Волжск оласе Новый уремыште «КамАЗ» машинам виктарыше 35 ияш водителят 72 ияш ӱдырамашым тӱкен. Тудат корно тӱр дене ошкылеш улмаш. Сусыргышо йолешкым эмлымверыш наҥгаеныт.
Канаш каяш шоненыт…
Волжск ола гыч 41 ияш ӱдырамаш шояк санаторийыш путевкым налын. Тидлан тудо 72 тӱжем теҥгем тӱлен.
Канаш каяш шонышо ӱдырамаш интернетыште Шем теҥыз воктене верланыше ик санаторийын сайтшым ужын да тушко каяш шканже уло ешыжлан веле огыл, тыгак палымыже-влакын ешыштлан путевкым налаш кумылаҥын. Тудлан темлыме илыме условият, акшат келшышын чучыныт. Адакшым тушко канаш миен толшо-шамыч санаторий нерген сайтыште чылажымат моткочак моктен возеныт. Тыге ӱдырамаш, нимыняр кокытеланыде, сайтыште улшо лӱмын ончыктымо формо дене путевкым налын да тидлан 72000 теҥгем тӱлен. Но вашке рашемын: тиде санаторий икмыняр ий ончычак пашам ыштымым чарнен.
Ты факт шотышто уголовный делам тарватыме.
Ӱшанаш вашкыман огыл!
Банк пашаеҥ семын йыҥгыртен, еҥ-влакым мошенник-шамыч тугак чӱчкыдын ондалат.
Кодшо кечылаште Йошкар-Олаште илыше 60 ияш пӧръеҥлан ик банк гыч палыдыме еҥ йыҥгыртен да лӱдыкшыдымылык службо пашаеҥ улмыж нерген каласен. Тудо йыҥгыртыме еҥлан погынышо бонус баллжым оксашке савыраш темлен. Нимо уда лийшашым шижде, пӧръеҥ саде «пашаеҥлан» банк картшын реквизитшым да смс дене толшо кодым каласен. Но тылеч вара икмыняр жап гыч тудын счетшо гыч 133000 теҥге оксаже «ӱштылалтын». Ондалалтмыжым умылымеке, пӧръеҥ полицийыш увертарен.
Тиде факт шотышто уголовный делам тарватыме.
Палымыжак шолыштын
24 мартыште полицийыш Звенигово районысо Мочалище поселко гыч 31 ияш пӧръеҥ йыҥгыртен да пӧртшӧ гыч телевизор йоммо нерген каласен. Тыгодым палемден: окнамат, омса тӱкылтышымат шалатыме огыл.
Уголовный розыск пашаеҥ-влак оперативно-кычалме пашам эртареныт да шолыштшым кученыт. Тиде осал пашам палымыжак ыштен улмаш. 33 ияш пӧръеҥ каласен: тудо пӧртшӧ деч сравочым кушко пыштен кодымыжым пален, да тидын дене пайдаланен. Нумал лекме телевизорым «йолташыже» пошкудо селаште илыше ик пӧръеҥлан улыжат ик кленча алкоголян йӱышлан пуэн.
Кызыт телевизорым озажлан пӧртылтеныт. А тиде факт шотышто уголовный делам тарватеныт да следствий кая.
Пожар
Шочмын, 23 мартыште, Оршанке районысо Изи Ӧрша ялыште пӧрт йӱлен. Пытартыш жапыште тушто иктат огеш иле улмаш.
Азап лийме нерген увер пожарно-утарыше службыш кастене 8 шагатат пеле гутлаште тудым ужшо-влак деч пурен. Но подразделенийын толын шумыжлан пӧрт леведыш кугу тул дене йӱлен, кӧргыжӧ шикш дене темше лийын. Участкыште кукшо шудо шуко лиймылан кӧра пожар пошкудо-влакын илыме пӧртлашкышт куснен кертын. Пиалеш, тулым жапыштыже йӧртен кертыныт.
Кызыт специалист-шамыч пожар тӱҥалме амалым рашемдат.
Кодшо арнян республикыште 25 вере пожар лийын.
Тышеч 10 — Йошкар-Олаште, 4 гыч — Волжск олаште да Звенигово районышто, 1 гыч — Волжский, Курыкмарий, Кужэҥер, Марий-Турек, Медведево, Оршанке, Параньга районлаште.
Идалык тӱҥалтыш гыч але марте республикыште 152 пожар лийын. Ӱмаште тыгаяк жапыште – 158. Тулышто 8 еҥ колен. 2018 ийыште тыгаяк жапыште 10 еҥ илыш дене чеверласен. Тений пожарыште 7 еҥ сусырген, ӱмаште – 4.
Любовь КАМАЛЕТДИНОВА
