Теҥгече «ВКонтакте» социальный сетьысе «ПАЛАТА №6» группышто шучко увер лектын: « Пеҥгыдемдыме огыл увер почеш, Волжск оласе больницыште коронавирус дене черланыме икымше случайым рашемдыме. Пӧръеҥ Италий гыч пӧртылын,43 ияш. Тудын кугу температуржым да кокырымыжым диагностироватлыме. Вӱржым Йошкар-Олашке эше ик гана тергаш колтымо».
Тиде уверлан «Администрация-городского-округа Город-Волжск» группо тыге вашештен: «Волжск оласе рӱдӧ больницын тӱҥ врачшын алмаштышыже И.М.Ибрагимовын уверже почеш, Волжск олаште коронавирусым рашемдыме случай уке».
Роспотребнадзорын Марий Элысе виктемжым вуйлатыше С.Булатован увертарымыж почеш, республикыштына коронавирус дене черланыме ик случайымат пеҥгыдемдыме огыл.
М.ИВАНОВА
